22 ліпеня, Мінск /Кар. БЕЛТА/. У Міністэрстве замежных спраў Беларусі ў адказ на пытанне БЕЛТА пракаменціравалі падпісанне прэзідэнтам Літвы Гітанасам Наўседай, які пастаянна заяўляе аб прыярытэце правоў чалавека, неадназначных паправак да закона "Аб прававым становішчы замежных асоб", паведамляе карэспандэнт БЕЛТА.
"Па факце мы яшчэ раз пераканаліся ў відавочным: правы канкрэтных людзей у Беларусі, Іраку гэта або Сірыі на справе абсалютна не хвалююць палітычнае кіраўніцтва Літвы. Разглагольстванне - гэта адно, а канкрэтныя ўчынкі сведчаць, на жаль, зусім аб іншым, - адзначылі ў МЗС. - Таму гэтымі днямі мы ўсе сталі сведкамі бесчалавечнага, здзеклівага стаўлення літоўскіх пагранічнікаў да іракцаў, якія, вымушаныя шукаць лепшую долю не па сваёй віне, спрабавалі атрымаць прыстанішча і прытулак у паспяховай і прыстойнай, як яны думалі, еўрапейскай краіне".
Як адзначылі ў МЗС, пасля такога жаху папраўкі да названага закона проста ўжо дапаўняюць відавочную карціну. "І няма сэнсу пералічваць палажэнні міжнароднага права, двухбаковых і шматбаковых пагадненняў, ды і проста маральных крытэрыяў, якія гэты закон не парушае. Такіх палажэнняў проста няма", - падкрэслілі ў прэс-службе ведамства.
"Цікава, што нават у самой Літве ёсць разважлівыя людзі, якія добра разумеюць, што гэта фактычна ўзаконіць парушэнне правоў чалавека ў адносінах да тых, хто спрабуе выратаваць сябе і сваіх дзяцей ад жахаў і наступстваў развязанай пад прыгожымі дэмакратычнымі лозунгамі вайны. Многія літоўскія юрысты выказалі заўвагі адносна верагоднай супярэчнасці паправак Канстытуцыі Літоўскай Рэспублікі. Але што мы чуем ад кіраўніцтва Літвы? Так, закон дрэнны, так, "дзіравы", ён парушае правы чалавека. Але нам, маўляў, трэба паслаць сігнал краінам - донарам бежанцаў. Сапраўды, якія ўжо тут правы, калі трэба паслаць нейкі сігнал!" - звярнулі ўвагу ў МЗС.
Там канстатавалі, што не чуваць рэзкіх заяў заходніх партнёраў наконт гэтых паправак: "Дзе праверкі і расследаванні? Атрымліваецца, што ў "дэмакратычнай" краіне можна і цяжарных жанчын пад аўтаматы? Можа, міжнародныя праваабарончыя арганізацыі, у якіх відавочна ёсць на гэта свабодныя рэсурсы, нават прыдумаюць для Літвы які-небудзь эксклюзіўны механізм маніторынгу і расследавання парушэнняў правоў чалавека - мігранты ж таксама людзі? Ці не?"
У ведамстве падкрэслілі, што спробы Вільнюса скрыць дапушчаную татальную дэградацыю сваёй сістэмы пагранічнай службы "шыты белымі ніткамі". "Раней гэта было магчыма, таму што многія гады гэту граніцу абараняла Беларусь, і літоўскаму боку можна было не хвалявацца. Затым, вобразна кажучы, літоўскія палітыкі сталі "стукаць малатком па міне". Сваёй мэты дабіліся. Цяпер робяць выгляд, што здзіўлены", - рэзюмавалі ў МЗС.
Як паведамлялася БЕЛТА, папраўкі, прадугледжаныя законам, пазбаўляюць прасіцеляў прыстанішча права абскардзіць рашэнні суда першай інстанцыі ў апеляцыйным парадку. Таксама скарочаны тэрміны разгляду просьбаў аб прадастаўленні прыстанішча ў сувязі з аб'яўленнем у краіне экстрэмальнай сітуацыі з-за наплыву мігрантаў.
Праваабарончыя арганізацыі заявілі, што папраўкі, па сутнасці, узаконяць парушэнні правоў чалавека. Юрысты выказалі заўвагі адносна верагоднай супярэчнасці паправак Канстытуцыі з-за незабяспечанага права на апеляцыю ў выпадку адмоўнага рашэння аб прадастаўленні прыстанішча.-0-
