Сучасныя тэхналогіі навучання і новыя вучэбныя праграмы прадставяць на выстаўцы ў Мінску з 14 па 16 лютага

11 студзеня, Мінск /Кар. БЕЛТА/. 22-я спецыялізаваная выстаўка для школьнікаў, абітурыентаў, студэнтаў, выпускнікоў ВНУ і бацькоў "Адукацыя і кар'ера" пройдзе ў выставачным комплексе "БелЭкспа" ў Мінску з 14 па 16 лютага, паведамілі БЕЛТА ў прэс-службе Міністэрства адукацыі.

У  ведамстве адбылося пасяджэнне рабочай групы па арганізацыі і правядзенні выстаўкі. Было адзначана, што ў апошнія гады выстаўка выклікае павышаную цікавасць у абітурыентаў, прадстаўнікоў ВНУ, каледжаў, арганізацый - заказчыкаў кадраў. У гэтым годзе наведвальнікам будуць прадстаўлены магчымасці ўстаноў прафесійнай адукацыі і арганізацый - заказчыкаў кадраў, пройдуць майстар-класы, інтэрактыўныя заняткі, семінары па розных напрамках.

"На працягу 22 гадоў выстаўка дэманструе адукацыйныя дасягненні Беларусі, сучасныя тэхналогіі навучання, вучэбнае абсталяванне, новыя вучэбныя праграмы і імкнецца звязаць таленавітую моладзь з лепшымі навучальнымі ўстановамі. Сакрэт поспеху выстаўкі ў тым, што з максімальнай эфектыўнасцю для ўдзельнікаў і зручнасцю для наведвальнікаў на адной выставачнай пляцоўцы можна азнаёміцца з усім спектрам адукацыйных паслуг і магчымасцей у сферы ўсіх узроўняў адукацыі ў краіне", - падкрэслілі ў прэс-службе.

У мінулым годзе выстаўка ўключыла ў сябе 132 удзельнікі, яна стала важнай падзеяй не толькі для абітурыентаў, студэнтаў, але і для прафесіяналаў, якія жадаюць атрымаць дадатковую кваліфікацыю і прасунуцца па службовай лесвіцы. "У гэтым годзе да праекта дадасца выстаўка "Вучэбныя тэхналогіі" - гэта дэманстрацыйная пляцоўка для вытворцаў і пастаўшчыкоў тэхналогій, вучэбнага абсталявання і рашэнняў, якія суправаджаюць адукацыйны працэс на розных ступенях навучання пад дэвізам "Будучыня надыходзіць сёння", - праінфармавалі ў ведамстве.-0-