Рэктар БДУКМ: наша сістэма па падтрымцы таленавітай і адоранай моладзі - прыклад для многіх краін

20 студзеня, Мінск /Кар. БЕЛТА/. Беларуская сістэма па падтрымцы таленавітай і адоранай моладзі можа быць прыкладам для многіх краін. Аб гэтым у прэс-цэнтры БЕЛТА заявіла рэктар Беларускага дзяржаўнага ўніверсітэта культуры і мастацтваў, намеснік старшыні савета спецыяльнага фонду Прэзідэнта па падтрымцы таленавітай моладзі Наталля Карчэўская.

"Тая сістэма па падтрымцы таленавітай і адоранай моладзі, якая выбудавана ў нас, шматступеньчатая і можа быць прыкладам для многіх краін, таму што любы грамадзянін Беларусі, а часам і не толькі, мае магчымасць праявіць сябе ў якім-небудзь напрамку. У гэтым сэнсе ВНУ сапраўды выконваюць функцыю пошуку таленавітай моладзі і часта ініцыююць, я цяпер кажу пра ўніверсітэт культуры і мастацтваў, асобныя праекты, якія дазволілі б рэалізавацца талентам. У прыватнасці, мы ў свой час прапанавалі правесці рэспубліканскі конкурс харэаграфічнага мастацтва "Дэнс кангрэс". У гэтым годзе ён будзе праводзіцца чацвёрты раз. Упершыню быў праведзены рэспубліканскі конкурс чытальнікаў, прысвечаны 80-годдзю вызвалення Рэспублікі Беларусь ад нямецка-фашысцкіх захопнікаў", - сказала Наталля Карчэўская.

Яна адзначыла, што такія праекты дапамагаюць як мага раней выявіць здольнасці маладых людзей. "Моладзь, якая атрымлівае заахвочванні з боку спецыяльнага фонду Прэзідэнта, мае права на паступленне без экзаменаў або ў творчыя ВНУ, або, калі гэта адораныя, то ў іншыя ВНУ. Але нават калі яны не з'яўляюцца лаўрэатамі спецфонду, не ўваходзяць у банк даных таленавітай моладзі, то дзейнасць краіны накіравана на тое, каб даць ім такую магчымасць. Напрыклад, уручэнне нашаму ўніверсітэту прэміі "За духоўнае адраджэнне" мы расцэньваем як беспрэцэдэнтную падтрымку моладзі. Як Прэзідэнт гаварыў на цырымоніі ўручэння прэміі, наша задача - выхаваць пакаленне, якое будзе за намі, трэба шукаць тых, з кім мы правядзём сваю старасць шчасліва і добра", - канстатавала рэктар.-0-