12 верасня, Кобрын /Кар. БЕЛТА/. У Кобрыне ў час рэспубліканскай акцыі "Беларусь адзіная" прадставілі выстаўку "ТэхнаКод Брэстчыны", на якой навучэнцы і студэнты паўднёва-заходняга рэгіёна прэзентавалі свае праекты і распрацоўкі, перадае карэспандэнт БЕЛТА.
Выстаўка разгарнулася ў фае Палаца культуры Кобрына. У ёй прынялі ўдзел студэнты ўніверсітэтаў Брэсцкай вобласці, навучэнцы васьмі ўстаноў агульнай сярэдняй адукацыі, чатырох устаноў дадатковай адукацыі і трох каледжаў. Яны прадставілі больш за 40 праектаў.
"Маладыя людзі паказваюць свае распрацоўкі, праекты. Сярод іх ёсць тыя, якія ўжо ўкаранёны і актыўна выкарыстоўваюцца ў вытворчасці на прадпрыемствах Брэсцкай вобласці, Беларусі ў цэлым і нават у Расіі. Гэтыя распрацоўкі датычацца будаўніцтва, аграрнага сектара, інфармацыйных тэхналогій. Наша моладзь крэатыўная. Яна хоча бачыць Беларусь у новай, лічбавай прасторы. На выстаўцы можна ўбачыць больш за ўсё рабатызаванай тэхнікі. Дзеці выкарыстоўваюць новыя тэхналогіі ў аграрным сектары, у 3D-мадэляванні", - расказала начальнік упраўлення сацыяльнай і выхаваўчай работы галоўнага ўпраўлення па адукацыі Брэсцкага аблвыканкама Ала Сянькевіч.
Напрыклад, студэнты Брэсцкага дзяржаўнага тэхнічнага ўніверсітэта, дзе з 1 верасня пачаў працаваць Цэнтр кампетэнцый прамысловай робататэхнікі і лічбавага інжынірынгу, паказалі робата-гуманоіда і робапса. Сярэдняя школа нумар 1 Баранавіч імя С.І. Грыцаўца прэзентавала магчымасці дзіцячага тэхнапарка.
Браты Ігнат і Сямён Сурма з Кобрына сабралі веламабіль. "Гэта сімбіёз веласіпеда і аўтамабіля - двухмесны, электрычны. Ёсць педалі, калі акумулятар разрадзіцца. Пачалі рабіць яго тры гады таму. Прыкладна за год, не спяшаючыся, стварылі. Да 1 верасня па правілах ён падыходзіў пад катэгорыю "веламабіль". Цяпер яго можна адвезці ў Мінск на экспертызу, яго правераць, можна паставіць на ўлік і ездзіць як на аўтамабілі. Далёкасці ходу хапае на 70 км, максімальная хуткасць - каля 60-70 км/гадз", - расказалі аб сваім транспартным сродку школьнікі. Гэта не адзіная тэхнічная распрацоўка, якой займаюцца браты.
Юлія Котава вучыцца на трэцім курсе ў Брэсцкім дзяржаўным універсітэце імя А.С. Пушкіна. Яна будучы спецыяліст ва ўрбаналогіі і сіці-менеджменце. "Хочацца, каб нашы гарады станавіліся больш прагрэсіўнымі, каб укараняліся новыя распрацоўкі, прымяняліся ў архітэктуры сучасныя дызайны, разумныя тэхналогіі. Я таксама ва ўніверсітэце займаюся распрацоўкамі. Хочацца, каб потым імі карысталіся іншыя і яны прыносілі карысць нашаму грамадству", - падзялілася дзяўчына.
Форум "Беларусь адзіная" ў Кобрыне сабраў амаль 650 чалавек рознага ўзросту. Гэта навучэнцы і студэнты, маладыя спецыялісты і іх вопытныя калегі, прадстаўнікі грамадскіх арганізацый.-0-
Падпісвайцеся на нас у
