Аляксандр Рагожнік і Алег Навіцкі
17 снежня, Масква /Эдуард Півавар - БЕЛТА/. Ордэн і лісты аб аб'яўленні Падзякі Прэзідэнта Беларусі ўручаны прадстаўнікам дзяржаўнай карпарацыі па касмічнай дзейнасці "Раскосмас". Урачыстая цырымонія адбылася 17 снежня ў Маскве ў пасольстве Беларусі ў Расіі, перадае карэспандэнт БЕЛТА.
У адпаведнасці з рашэннямі кіраўніка беларускай дзяржавы Аляксандра Лукашэнкі, ордэнам Дружбы народаў узнагароджаны генеральны дырэктар "Раскосмасу" Юрый Барысаў, Падзякі Прэзідэнта Беларусі аб'яўлены выканаўчаму дырэктару па пілатуемых касмічных праграмах дзяржкарпарацыі "Раскосмас" Сяргею Крыкалёву, касманаўту-выпрабавальніку Навукова-даследчага выпрабавальнага цэнтра падрыхтоўкі касманаўтаў Ю.А.Гагарына Алегу Навіцкаму і начальніку гэтага цэнтра Максіму Харламаву. Узнагарод яны ўдастоены за значныя дасягненні ў сферы касмічнай дзейнасці, вялікі ўклад у навуковыя даследаванні, падрыхтоўку высокакваліфікаваных кадраў, умацаванне міжнароднага супрацоўніцтва.
"Адным з важных этапаў пабудовы Саюзнай дзяржавы стала супрацоўніцтва ў галіне космасу. Сёння ў гэты ўрачысты дзень па даручэнні Прэзідэнта Рэспублікі Беларусь Аляксандра Рыгоравіча Лукашэнкі дазвольце мне выканаць пачэсную місію і ўзнагародзіць тых знакавых для абедзвюх дзяржаў грамадзян, якія ўнеслі вялікі ўклад у першы палёт беларускага касманаўта Марыны Васілеўскай і далучэнне Рэспублікі Беларусь да клуба касмічных дзяржаў", - заявіў на цырымоніі пасол Беларусі ў Расіі Аляксандр Рагожнік.
"Дзякуй за ацэнку нашай сціплай працы. Нам вельмі прыемна", - сказаў ад імя ўсіх узнагароджаных кіраўнік "Раскосмасу" Юрый Барысаў.
Ён адзначыў, што ў супрацоўніцтве Беларусі і Расіі асаблівую ролю займае асваенне космасу. "Мы цесна працуем з беларускімі прадпрыемствамі, цяпер поўным ходам вядуцца работы па стварэнні расійска-беларускага касмічнага апарата дыстанцыйнага зандзіравання Зямлі. Мы з калегамі з прадпрыемства "Пеленг" у цесным кантакце, з Нацыянальнай акадэміяй навук Беларусі, Дзяржаўным ваенна-прамысловым камітэтам у нас пастаянная сувязь. Супрацоўніцтва наша толькі ўмацоўваецца. Знакавай падзеяй у гэтым годзе быў палёт першага беларускага касманаўта Марыны Васілеўскай, якая з годнасцю прайшла ўвесь этап падрыхтоўкі, выканала ўсю запланаваную праграму, унесла значны ўклад у асваенне космасу", - падкрэсліў Юрый Барысаў.
"Спадзяёмся, што гэта не апошні палёт. Мы цяпер распрацоўваем новую расійскую арбітальную станцыю і вельмі спадзяёмся, што на гэтай станцыі знойдзецца месца і беларускім касманаўтам. А яшчэ лепш, калі мы з вамі пабудуем асобны беларускі модуль у складзе нашай станцыі, які будзе даследаваць калязямную прастору на працягу многіх гадоў", - заявіў кіраўнік "Раскосмасу".-0-
Падпісвайцеся на нас у
