8 кастрычніка, Мінск /Кар. БЕЛТА/. Старт 14-га сезона адукацыйнага праекта "Акадэмія камунікацыі" адбудзецца 13 кастрычніка на YouTube-канале кафедры тэхналогій камунікацыі і сувязей з грамадскасцю факультэта журналістыкі БДУ. Аб гэтым БЕЛТА расказалі на факультэце.
Тэма першага занятку - "Хто ж збірае кубік: знаёмімся з прафесіяй камунікатара", запрошаным спікерам выступіць PR-партнёр IT-кампаніі SoftTeco, выканаўчы дырэктар Асацыяцыі кампаній камунікатыўных кансультантаў Таісія Пастухова.
"Акадэмія камунікацыі" - штогадовы праект кафедры тэхналогій камунікацыі і сувязей з грамадскасцю факультэта журналістыкі. Гэта серыя майстар-класаў, дзе студэнты і эксперты дзеляцца карыснымі ведамі і кейсамі сферы камунікацыі з усімі жадаючымі. У час першага занятку гледачы азнаёмяцца з функцыямі, абавязкамі і магчымымі месцамі работы спецыяліста па камунікацыі, а Таісія Пастухова на асабістым прыкладзе раскажа аб кар'еры ў гэтай сферы. Удзел бясплатны па папярэдняй рэгістрацыі", - расказалі на факультэце журналістыкі.
На канцэпцыю 14-га сезона арганізатараў натхнілі маляўнічасць і шматграннасць кубіка Рубіка. На занятках студэнты будуць разбіраць розныя грані камунікацыйнай дзейнасці. Гэта дапаможа ўбачыць, як правільна і эфектыўна камбінаваць розныя інструменты прафесійнай дзейнасці ў галіне камунікацыі. Заняткі будуць праходзіць раз у два тыдні. Гледачы больш даведаюцца аб капірайтынгу, SMM, рэкламе, крэатыве, унутраным і знешнім PR, івентах, а таксама аб тым, як беларускія кампаніі адаптаваліся пад сучасныя няпростыя ўмовы.
У сувязі са складанай эпідсітуацыяй новы сезон будзе праходзіць у анлайн-фармаце ў выглядзе прамых эфіраў. Пазней запісы будуць даступны на афіцыйным YouTube-канале кафедры. "Камандзе арганізатараў гэтага года, вядома, складаней, чым іх папярэднікам, - пракаменціравала куратар праекта, старшы выкладчык кафедры тэхналогій камунікацыі і сувязей з грамадскасцю Лікія Яніцкая. - Але мы з вялікім энтузіязмам успрымаем перавод праекта ў фармат анлайн-трансляцый. "Акадэмія камунікацыі" створана, каб нашы студэнты навучыліся арганізоўваць мерапрыемствы: ад распрацоўкі крэатыўнай канцэпцыі да пошуку партнёраў і папулярызацыі праекта па розных каналах. У гэтым годзе студэнты-арганізатары змогуць набыць яшчэ і ўнікальны вопыт у digital-камунікацыі, на якой мы зробім асноўны ўпор".
Больш інфармацыі аб праекце можна знайсці ў сацыяльных сетках "Акадэміі камунікацыі" "УКантакце", Instagram і Facebook.-0-
