24 верасня, Брэст /Кар. БЕЛТА/. Перад пунктам пропуску "Брэст" пачынаюць збірацца транспартныя сродкі. Карэспандэнты БЕЛТА пагаварылі з тымі, хто ў чарзе чакае ўезду ў Польшчу.
"Бачыце, яны супакоіліся і вырашылі, што трэба нанова адкрываць (пункты пропуску. - Заўвага БЕЛТА). Таму што, я думаю, страчваюць яны нямала ад таго, што пазакрывалі. Вось і ўсё. Але наогул, гэта не па-суседску - закрываць граніцу", - выказаў думку мужчына. Да пункта пропуску "Брэст" ён прыехаў 24 верасня бліжэй да 21.00. "Забралі пасажыраў з вакзала. Не ведаю, чаго чакаць. Можна за гадзіну заехаць, а можна і за 12. Складана сказаць, як будзе", - заўважыў вадзіцель.
Яшчэ ў адным аўтобусе едзе мінчанін Аляксей. Яго канечны пункт назначэння - Іспанія. Адпачынак быў даўно запланаваны. "Узяў білет транзітам праз Латвію, але мне патэлефанавалі і сказалі, што Польшча адкрывае граніцу і аўтобус будзе перанесены. І вось я тут", - расказаў малады чалавек. Ён дадаў, што яму крыўдна з-за таго, што Польшча закрыла граніцу з Беларуссю. "Пакутуюць жа самыя звычайныя людзі, не нехта іншы - мы. Складана дабірацца да родных, да блізкіх, ды проста на адпачынак. Але што рабіць? Спадзяюся, што хутка на гэты раз пройдзем граніцу. Разлічваю да раніцы быць у Варшаве", - спадзяецца Аляксей.
Уладзіслаў працуе вадзіцелем. Напярэдадні закрыцця Польшчай граніцы ён таксама быў у чарзе. Тады аказаўся сярод шчасліўчыкаў, якія паспелі перасячы з пасажырамі граніцу. А вось пасля гэтага ўзнікла нявызначанасць: разумення, калі польскі бок адновіць работу сваіх пунктаў пропуску, ні ў кога не было.
Андрэй разам з сябрамі і калегамі з Гродна разглядаў некалькі шляхоў, каб трапіць у Варшаву. Спачатку яны планавалі ехаць на поездзе праз Калінінград, але пасля знайшлі больш бюджэтны варыянт: аўтобус праз Латвію. Яны спадзяваліся, што хутка перасякуць граніцу, але іх чаканні не апраўдаліся. Там чакаць трэба было двое-трое сутак. Аднак у гэты ж дзень таварышы расказалі Андрэю, што едуць у Брэст - граніцу ж абяцаюць адкрыць. "Мы стаім тут з дзвюх гадзін ночы, гавораць, хутка адкрыюць. Мы чакаем, спадзяёмся", - дадаў Андрэй.
Як паведамлялася, у Дзяржаўны пагранічны камітэт Беларусі Пагранічная варта Польшчы прыслала афіцыйнае паведамленне аб адкрыцці 25 верасня з 1.00 па беларускім часе закрытых амаль два тыдні таму пунктаў пропуску.-0-
Фота Віялеты Южаковай
Падпісвайцеся на нас у
