16 мая, Мінск /Кар. БЕЛТА/. Міністэрства па надзвычайных сітуацыях нагадала правілы бяспекі пры моцным ветры, паведамляе БЕЛТА са спасылкай на ведамства.
У Беларусі сёння чакаецца паўночна-заходні ўмераны вецер, днём парывісты, месцамі моцны парывісты. Парывы могуць узмацняцца да 15-18 м/с.
У МНС пры моцным ветры рэкамендуюць адмовіцца ад паездак, непагоду лепш перачакаць у памяшканні. Транспарт трэба паставіць у гараж, а пры яго адсутнасці паркавацца ўдалечыні ад дрэў і слаба замацаваных канструкцый.
"Калі моцны вецер застаў вас на вуліцы, абыходзьце хісткія будынкі і дамы з няўстойлівым дахам. Пазбягайце дрэў, збудаванняў павышанай рызыкі (мастоў, эстакад, трубаправодаў, ліній электраперадачы, патэнцыяльна небяспечных прамысловых аб'ектаў). Асцерагайцеся частак канструкцый і прадметаў, якія навіслі на будынках, абарваных правадоў ліній электраперадачы, разбітага шкла", - звярнулі ўвагу ў МНС.-0-
