Крутой: у Беларусі вельмі шмат увагі ўдзяляецца сістэме аховы здароўя 

4 кастрычніка, Крычаў /Кар. БЕЛТА/. У Беларусі вельмі шмат увагі ўдзяляецца сістэме аховы здароўя. Аб гэтым заявіў у час адкрыцця новай паліклінікі ў Крычаве кіраўнік Адміністрацыі Прэзідэнта Беларусі, упаўнаважаны прадстаўнік Прэзідэнта ў Магілёўскай вобласці Дзмітрый Крутой, перадае карэспандэнт БЕЛТА. 

"У нашай краіне вельмі шмат увагі ўдзяляецца сферы аховы здароўя. За 20 гадоў працягласць жыцця вырасла на 5 гадоў. Па колькасці практыкуючых урачоў, сярэдняга медыцынскага персаналу, колькасці месцаў у бальніцах наша рэспубліка займае вядучыя месцы ў Еўропе, апярэджваючы Германію, Швейцарыю, Нідэрланды, Польшчу і іншыя краіны", - адзначыў Дзмітрый Крутой. 

Ён акцэнтаваў увагу на тым, што, у прыватнасці, у Магілёўскай вобласці ў сферу аховы здароўя ўкладзены вялікія сродкі - больш як Br1 млрд у матэрыяльна-тэхнічную базу. "Гэта садзейнічае замацавальнасці ўрачоў, цякучасць становіцца меншай, растуць зарплаты, - адзначыў Дзмітрый Крутой. - Мы падтрымліваем маладых урачоў, якія прыходзяць у бальніцы, стараемся прымаць меры, каб яны замацоўваліся на рабочым месцы".

Наступны важны элемент дзяржаўнай палітыкі - арэнднае жыллё. Дзмітрый Крутой заклікаў усіх быць больш актыўнымі ў гэтым пытанні, у тым ліку і на ўзроўні старшыні Крычаўскага райвыканкама. "Цяпер якраз фарміруецца пералік запатрабаваных прафесій і тых спецыялістаў, якія маюць патрэбу ў паляпшэнні жылля. Сярод іх будуць і медыкі. І пад гэта мы будзем фарміраваць жыллёвую праграму на наступныя пяць гадоў", - паведаміў ён. 

Арэндныя дамы для медыкаў ужо ўвялі ў Бабруйску і Магілёве. Кіраўнік Адміністрацыі Прэзідэнта звярнуў увагу, што будаваць такое жыллё толькі ў буйных гарадах няправільна. Неабходна працаваць у тым ліку з такімі населенымі пунктамі, як Крычаў. Крычаўская ЦРБ стала трэцім у вобласці міжраённым медыцынскім цэнтрам. 

Дзмітрый Крутой нагадаў, што ў сваёй перадвыбарнай праграме Аляксандр Лукашэнка абазначыў важны пасыл. "За гэтыя пяць гадоў мы павінны адшліфаваць краіну і давесці яе да ўзорнага стану. Якаснай інфраструктуры ўдзяляецца каласальная ўвага, - адзначыў ён. - Дзяржаўная праграма, накіраваная на моцную і здаровую нацыю, будзе адной з асноўных у наступным годзе, на яе будуць выдзелены вялікія рэсурсы". 

Кіраўнік Адміністрацыі Прэзідэнта падкрэсліў, што беларусы пільна сочаць за работай сферы аховы здароўя - у структуры зваротаў грамадзян у Адміністрацыю Прэзідэнта медыцына і ахова здароўя займае другое месца пасля ЖКГ. Асноўныя прэтэнзіі: чэргі ў паліклініках, складанасці з запісам на прыём да вузкага спецыяліста, чэргі на пратэзаванне суставаў або аперацыі на сэрцы. Дзмітрый Крутой пажадаў калектыву новай паліклінікі ў Крычаве вырашыць гэтыя праблемы на сваёй базе і стаць прыкладам для іншых.-0-