Качанава: сенатары Беларусі і Расіі пачалі падрыхтоўку чарговага Форуму рэгіёнаў

1 кастрычніка, Мінск /Кар. БЕЛТА/. Сенатары Беларусі і Расіі пачалі падрыхтоўку XIII Форуму рэгіёнаў, які пройдзе ў 2026 годзе ў Мінску і Мінскай вобласці, паведаміла старшыня Савета Рэспублікі Наталля Качанава на сустрэчы з намеснікам старшыні Савета Федэрацыі РФ Юрыем Вараб'ёвым, перадае карэспандэнт БЕЛТА.

У час сённяшняй сустрэчы ў Савеце Рэспублікі асаблівы акцэнт быў зроблены на маючым адбыцца XIII Форуме рэгіёнаў. "Мы працуем па ўсіх ужо напрамках для далейшага падпісання пагадненняў і кантрактаў, якія будуць заключацца ў рамках правядзення гэтага важнага мерапрыемства", - сказала Наталля Качанава.

Спікер паведаміла, што сенатары сочаць за рэалізацыяй тых дамоўленасцей, якія былі дасягнуты ў ходзе папярэдняга Форуму рэгіёнаў. Гэта неабходна перш за ўсё, каб прырастаць эканамічна і ўмацоўваць узаемавыгаднае супрацоўніцтва.

"Стварэнне сумесных прадпрыемстваў, сумесныя напрацоўкі ў машынабудаванні. Вядома, гэта цудоўна. Нашы краіны працуюць разам у кааперацыі. Умацоўваючы эканоміку, мы ўмацоўваем у цэлым нашу Саюзную дзяржаву", - адзначыла Наталля Качанава.

Спікер Савета Рэспублікі звярнула ўвагу, што Беларусь і Расія сёння супрацоўнічаюць па ўсіх напрамках, у тым ліку ў міжнародных арганізацыях.

"Мы ўдзячны нашым калегам-сенатарам за падтрымку Беларусі на ўсіх міжнародных пляцоўках. Гэтак жа, як і мы падтрымліваем вас. Гэта вельмі важна ў цяперашні няпросты час, калі міжнародныя адносіны нестабільныя, - сказала спікер. - Сёння Беларусь з'яўляецца паўнапраўным членам Шанхайскай арганізацыі супрацоўніцтва, у якасці партнёра - у БРІКС. Гэта сведчыць аб тым, што краіны, якія сёння думаюць у адным напрамку, аб'ядноўваюцца. Таму наша супрацоўніцтва ў рамках Саюзнай дзяржавы вельмі важнае. У такіх структурах мы ўзаемадзейнічаем дакладна".

Наталля Качанава падкрэсліла, што плённае супрацоўніцтва - вынік цеснага ўзаемадзеяння лідараў дзвюх краін.

"Наш Прэзідэнт заўсёды падкрэслівае, азіраючыся назад, што мы зрабілі абсалютна правільны выбар. Выбар на карысць супрацоўніцтва з Расійскай Федэрацыяй. І гэта выратавала нашы краіны ад эканамічнай катастрофы, якая магла б быць, - адзначыла старшыня Савета Рэспублікі. - Сёння станоўчыя тэндэнцыі захоўваюцца. Гэта сведчыць аб тым, што мы на правільным шляху і ніякія санкцыі нам не пагроза".

Пасля сустрэчы ў каментарыі журналістам Юрый Вараб'ёў адзначыў, што такія сустрэчы напярэдадні пасяджэння міжпарламенцкай камісіі Беларусі і Расіі сталі традыцыйнымі. Бакі кантралююць ход выканання даручэнняў, рэалізацыі пагадненняў, якія заключаюцца ў ходзе Форуму рэгіёнаў, і робяць усё магчымае, каб яны рэальна выконваліся.

У Савеце Рэспублікі сёння адбылася вельмі падрабязная, канкрэтная, карысная для двух бакоў размова. "Вядома, вельмі важна, каб нашы адносіны - не толькі міжпарламенцкія, але і чалавечыя - паміж Расіяй і Беларуссю - захоўваліся. У многім гэта, вядома, залежыць ад нас, парламентарыяў. Таму не толькі форумы, не толькі пасяджэнні камісіі, але і розныя іншыя мерапрыемствы мы плануем праводзіць, асабліва маладзёжныя, у рамках нашай міжпарламенцкай дзейнасці", - сказаў Юрый Вараб'ёў.

Намеснік старшыні Савета Федэрацыі праінфармаваў, што пачынаючы з 2026 года Форумы рэгіёнаў плануецца праводзіць адзін раз у два гады. Гэта звязана са з'яўленнем яшчэ аднаго форуму - патрыятычнага, які будзе праходзіць напярэдадні 9 Мая. Аднак старшыні Савета Рэспублікі і Савета Федэрацыі будуць сустракацца паміж форумамі па пэўных тэмах, і такія тэмы сёння абмяркоўваліся.

Паводле яго слоў, парламенцкія сустрэчы даюць магчымасць не толькі адрэгуляваць заканадаўства, але і забяспечыць рэалізацыю новых цікавых праектаў, якія агаворваюцца і ў далейшым рэалізуюцца.