Якія шыны лічацца зімовымі ў адпаведнасці з новымі ПДР, расказалі ў ДАІ

20 кастрычніка, Мінск /Кар. БЕЛТА/. Якія шыны лічацца зімовымі ў адпаведнасці з новымі ПДР, расказалі ў ГУУС Мінгарвыканкама.

У Беларусі пры ўдзеле ў дарожным руху з 1 снежня па 1 сакавіка аўтамабілі павінны быць абсталяваны зімовымі шынамі на ўсіх колах, з аднолькавым рысункам пратэктара на адной восі. Гэта патрабаванне не датычыцца грузавых аўтамабіляў звыш 3,5 т, а таксама аўтобусаў звыш 5 т.

Зімовыя шыны - гэта шыны, на маркіроўцы якіх адначасова прысутнічаюць два знакі: знак горнай вяршыні з трыма пікамі і сняжынкай унутры, адзін са знакаў "M+S", "M&S", "MS".

"Калі на маркіроўцы нанесены абодва знакі, такія шыны лічацца зімовымі, у тым ліку пры наяўнасці любых дадатковых абазначэнняў (+ All Season; Road+Winter (R+W); Any Weather і інш.) У час эксплуатацыі зімовыя шыны павінны мець астаткавую глыбіню рысунка пратэктара не меншую за 4 мм", - растлумачылі ў ДАІ.

За ўдзел у дарожным руху на летніх або зношаных шынах зімой прадугледжана адміністрацыйная адказнасць: папярэджанне або штраф да адной базавай велічыні (Br42), а пры паўторным на працягу года - ад 2 да 5 БВ (Br84 - Br210). Акрамя таго, калі такое парушэнне прывядзе да стварэння аварыйнай сітуацыі або ДТЗ, штраф прадугледжаны значна вышэйшы з магчымым пазбаўленнем права кіравання.-0-