Як кіраўніцтва школ вучаць працаваць са штучным інтэлектам, расказалі ў Акадэміі адукацыі

29 жніўня, Мінск /Кар. БЕЛТА/. Загадчык кафедры педагогікі і менеджменту адукацыі Акадэміі адукацыі Інеса Бразгунова расказала ў праекце БЕЛТА "Краіна гаворыць" аб тым, як кіраўніцтва школ навучаюць рабоце са штучным інтэлектам.

Катэгорыя слухачоў Акадэміі адукацыі - гэта дырэктары школ і іх намеснікі. "Паколькі ў нас вялікі вопыт выкладання лічбавых тэхналогій, вядома, калі сталі даступны шырока і свабодна тэхналогіі штучнага інтэлекту, то мы кропкава пачалі пра іх гаварыць, напэўна, недзе год, можа, паўтара таму. Спачатку, калі мы прыходзілі ў групу і пыталі ў нашых слухачоў, хто ўжо з імі працаваў, нясмела падымаліся адна-дзве рукі. Але цяпер мы бачым проста лавінападобны рост гэтых карыстальнікаў. З кожным месяцам іх усё больш і больш", - расказала Інеса Бразгунова.

Пры гэтым у слухачоў ёсць такая асаблівасць: яны не гавораць, што ведаюць нешта, пакуль дасканала ў гэтым не разбяруцца. "Гэта значыць, калі мы пытаем, хто ведае пра ШІ, то рукі падымае паўгрупы, а потым аказваецца, што другая палова таксама ўжо знаёма, проста яны не могуць гэта падрабязна і дэталёва апісаць. Таму дасведчанасць і цікавасць вельмі высокія", - падкрэсліла яна.

Акрамя таго, цяпер слухачы задаюць ужо больш канкрэтныя пытанні. Напрыклад, як скласці запыт, як ацаніць дакладнасць інфармацыі, як крытычна ацаніць вынікі таго, што выдаў штучны інтэлект. Паводле слоў Інесы Бразгуновай, у першую чаргу ў адукацыі неабходна падрыхтаваць педагогаў, каб яны маглі гэта тлумачыць і школьнікам, і студэнтам. "Мы цяпер у гэтым напрамку вельмі актыўна працуем", - адзначыла спецыяліст.

Разам з тым за апошнія паўгода зроблена многае. "У нас была створана рабочая група па ініцыятыве Міністэрства адукацыі, у якую ўвайшлі прадстаўнікі Акадэміі адукацыі, рэгіянальных інстытутаў развіцця адукацыі, педагогі-піянеры, наватары ў гэтай галіне. Мы сумесна, па-першае, падрыхтавалі модуль павышэння кваліфікацыі для педагогаў, які ўжо ўкаранёны ў Акадэміі адукацыі і ў рэгіянальных інстытутах развіцця адукацыі. Ужо такія тэмы на павышэннях кваліфікацыі асвятляюцца", - сказала яна.

Таксама ў гэтым годзе прайшоў рэспубліканскі конкурс метадычных распрацовак педагогаў у галіне прымянення штучнага інтэлекту ў адукацыйнай дзейнасці. "Мы не чакалі такой цікавасці. У нас было пададзена больш за 400 заявак на гэты конкурс. Гэта вельмі шмат, што таксама сведчыць аб тым, што людзі не проста цікавяцца, яны ўжо нешта зрабілі. Няхай гэта, можа, не глабальная распрацоўка, няхай гэта нейкая прыватная рэч, але яна цікавая і людзі не проста так гэта робяць", - звярнула ўвагу загадчык кафедры.

Лепшыя конкурсныя работы апублікаваны на сайце Акадэміі адукацыі. Там ёсць раздзел аб тэхналогіях штучнага інтэлекту, дзе ёсць пералік сэрвісаў, якія рэкамендуюцца да выкарыстання, прыклады промптаў, гэта значыць запытаў. "30 мая ў нас прайшла рэспубліканская канферэнцыя педагогаў, якая таксама была праведзена Міністэрствам адукацыі на базе Акадэміі адукацыі. На гэтай канферэнцыі мы абмеркавалі праект метадычных рэкамендацый па выкарыстанні ШІ ў адукацыйным працэсе. Мы распрацоўвалі гэты праект, потым удзельнікі канферэнцыі яго абмеркавалі, вельмі ўважліва паставіліся, вельмі шмат было правак і прапаноў. Мы іх па магчымасці ўлічылі і, наколькі я ведаю, у ліпені ўжо гэтыя метадычныя рэкамендацыі былі зацверджаны і яны ўжо могуць выкарыстоўвацца ў новым навучальным годзе", - расказала яна.-0-

*Праект створаны за кошт сродкаў мэтавага збору на вытворчасць нацыянальнага кантэнту.