Хаменка: многія зайздросцяць той практычнай рэалізацыі законаў, якая склалася ў нас у краіне

9 снежня, Мінск /Кар. БЕЛТА/. Узаемадзеянне дэпутатаў Палаты прадстаўнікоў і членаў Савета Рэспублікі пры падрыхтоўцы законапраектаў даволі эфектыўнае, заявіў журналістам намеснік старшыні Савета Рэспублікі Нацыянальнага сходу Рэспублікі Беларусь Сяргей Хаменка, перадае карэспандэнт БЕЛТА.

Сёння праходзіць пасяджэнне экспертнага савета пры Савеце Рэспублікі. На разгляд вынесены законапраект "Аб змяненні кодэксаў па пытаннях крымінальнай адказнасці". У верасні ён прыняты Палатай прадстаўнікоў у першым чытанні, прайшоў шырокае грамадскае абмеркаванне і цяпер рыхтуецца да разгляду ў другім чытанні. Законапраект накіраваны на збалансаванне норм Крымінальнага права. Перагледжаны санкцыі 97 складоў злачынства, 65 з іх дапаўняюцца альтэрнатыўнымі, больш мяккімі відамі пакаранняў. З іх 24 на сённяшні дзень змяшчаюць толькі пазбаўленне волі як адзіна магчымае пакаранне. Гэта дае магчымасць узмацніць прынцып справядлівасці назначанага пакарання, але не нівеліруе прынцып няўхільнасці пакарання.

"Экспертны савет - гэта ўзор той палітыкі, таго юрыдычнага алгарытму, які ў нас у краіне склаўся і які працуе для народа і ў імя народа, - сказаў Сяргей Хаменка. - Законапраект "Аб змяненні кодэксаў па пытаннях крымінальнай адказнасці" прайшоў усе стадыі абмеркавання на ўсіх узроўнях, пачынаючы з дыялогавых пляцовак у калектывах, арганізацыях, дзе спецыялісты выказвалі, з аднаго боку, сваю думку, а з іншага боку, перспектыўна прагназавалі і мадэлявалі варыянты развіцця падзей у выпадку прыняцця гэтага закона. Таму абмеркаванне законапраекта на экспертным савеце мае на мэце сітуацыю змадэляваць так, каб далажыць кіраўніку дзяржавы аб усіх пазітыўных і магчымых негатыўных момантах у выпадку прыняцця гэтага закона. Але парламентарыі і тыя эксперты, якія працуюць над законапраектам - робяць усё, каб ніякіх негатыўных наступстваў пасля прыняцця гэтага нарматыўнага прававога акта не было".