Генеральныя трэніроўкі парада 9 Мая ў Мінску пройдуць 2 і 6 мая

14 красавіка, Мінск /Кар. БЕЛТА/. Генеральныя трэніроўкі парада 9 Мая ў Мінску пройдуць 2 і 6 мая. Аб гэтым паведаміў камандзір каменданцкага батальёна Мінскай ваеннай камендатуры падпалкоўнік Дзяніс Більман у праекце БЕЛТА "Краіна гаворыць".

Дзяніс Більман расказаў, што дзве генеральныя трэніроўкі парада 9 Мая ў Мінску пройдуць 2 і 6 мая з 22.00.

"Заўсёды гэта выклікае ажыятаж у жыхароў Мінска і гасцей сталіцы. Там няма ніякіх сур'ёзных ачапленняў, можна падысці практычна на адлегласць, груба кажучы, выцягнутай рукі і цалкам паглядзець на рытуал ваеннага парада. Зразумела, што гэта трэніроўка, але зноў жа, пабыць побач з параднымі разлікамі, з механізаванай калонай будзе даступна для жадаючых 2 і 6 мая з 22.00. Пачатак трэніроўкі - на перасячэнні праспекта Пераможцаў і праспекта Машэрава", - анансаваў ён.

Усяго ў парадзе прымуць удзел больш за 4 тыс. чалавек ад усіх ваенных ведамстваў і структур Беларусі. Будзе прадстаўлена больш за 220 адзінак рознай баявой тэхнікі і больш за 30 адзінак авіяцыйнай. "Крыху больш за 4 тыс. - гэта толькі тыя, хто будзе ісці па праспекце. Яшчэ больш за 1 тыс. чалавек будзе задзейнічана менавіта ў забеспячэнні самога ваеннага парада. Гэта і пытанні рэгулявання, і ажыццяўлення бяспекі дарожнага руху, і арганізацыя сувязі, і медыцынскае забеспячэнне, і матэрыяльна-тэхнічнае забеспячэнне. Вельмі шмат людзей і велізарныя сілы расходуюцца на тое, каб ваенны парад прайшоў без сучка, без задзірынкі, каб дарыць толькі радасць гледачам і гасцям нашай сталіцы", - падкрэсліў Дзяніс Більман.-0-

*Праект створаны за кошт сродкаў мэтавага збору на вытворчасць нацыянальнага кантэнту.