12 мая, Мінск /Кар. БЕЛТА/. Еўрапейская супольнасць эндакрынолагаў (ESE) прадставіла абноўленую пазіцыю экспертаў ESE і ўсёй эндакрыналагічнай супольнасці наконт эндакрыннага фенатыпу COVID-19 і яго значэння для прафілактыкі і лячэння захворвання, паведаміла БЕЛТА прафесар кафедры эндакрыналогіі Беларускага дзяржаўнага медыцынскага ўніверсітэта, старшыня Беларускага грамадскага медыцынскага аб'яднання "Эндакрыналогія і метабалізм", доктар медыцынскіх навук Ала Шапялькевіч.
Яна адзначыла: так званы эндакрынны фенатып COVID-19 паступова набывае клінічную значнасць. "Цукровы дыябет адыгрывае важную ролю ў гэтым фенатыпе, паколькі ён з'яўляецца адным з найбольш частых спадарожных захворванняў, асацыіраваных з цяжкасцю праходжання і смяротнасцю ад COVID-19. Уважлівы кантроль глікеміі, мадыфікацыя цукразніжаючай тэрапіі цукровага дыябету (устаноўленага раней або ўпершыню выяўленага), асабліва пры шпіталізацыі, важныя для зніжэння рызыкі цяжкіх вынікаў COVID-19", - падкрэсліла прафесар кафедры.
Паводле слоў Алы Шапялькевіч, атлусценне павышае ўспрымальнасць да SARS-CoV-2 і рызыку неспрыяльных вынікаў COVID-19. Таму пацыентам з атлусценнем неабходна змяніць спосаб жыцця, каб знізіць масу цела і папярэдзіць рызыку інфіцыравання і цяжкіх наступстваў COVID-19.
Дэфіцыт/недастатковасць вітаміну D, гіпакальцыемія і пераломы пазванкоў таксама часта сустракаюцца ў шпіталізаваных пацыентаў з COVID-19 і павышаюць неспрыяльныя вынікі захворвання. У пацыентаў з наднырачнай недастатковасцю пры COVID-19 патрабуецца хуткая адаптацыя дозы глюкакартыкоідаў. Таксама ў абноўленай пазіцыі адзначана роля палавых гармонаў, гіпаталама-гіпафізарнай дысфункцыі, тырэоідныя аспекты пры COVID-19. Акрамя таго, з прычыны масавай вакцынацыі разгледжаны патэнцыяльныя наступствы для пацыентаў з эндакрыннымі захворваннямі.-0-
