23 лютага, Мінск /Кар. БЕЛТА/. У гісторыка-культурным комплексе "Лінія Сталіна" 25 лютага пры падтрымцы Міністэрства абароны пройдуць святочныя мерапрыемствы, прысвечаныя 105-годдзю Узброеных Сіл і Дню абаронцаў Айчыны. Аб гэтым БЕЛТА паведамілі ў Міністэрстве абароны.
Для жыхароў і гасцей Беларусі арганізатары падрыхтавалі маштабныя ваенна-гістарычныя рэканструкцыі, дэманстрацыю майстэрства ваенных кінолагаў, а таксама паказальныя выступленні ваеннаслужачых з дэманстрацыяй розных узораў сучаснай ваеннай тэхнікі. Свае баявыя магчымасці прадэманструюць танкі Т-72Б і Т-72Б3, авіяцыя Іл-76, СУ-30 СМ, СУ-25, Як-130, Л-39, Ан-26, Мі-8МТБ-5 і Мі-24. Акрамя таго, на цэнтральнай сцэне для гасцей свята выступяць удзельнікі акадэмічнага ансамбля песні і танца Узброеных Сіл.
Міністэрства абароны на тэрыторыі комплексу арганізуе цір з магчымасцю пастраляць з АК-47, а таксама лазерны цір і тры пункты харчавання, можна будзе пракаціцца на БТР-80. Усё гэта будзе бясплатна. Дадаткова да асноўнай праграмы мерапрыемства для наведвальнікаў будзе адкрыта некалькі інтэрактыўных зон. Кожны госць свята зможа паспрабаваць свае сілы ў гістарычнай віктарыне, стральбе з пнеўматыкі, зборцы-разборцы зброі і іншых майстар-класах, а самыя актыўныя ўдзельнікі будуць узнагароджаны дыпломамі і каштоўнымі прызамі.
У дзень святочнага мерапрыемства з 9.30 да 17.00 для жадаючых наведаць "Лінію Сталіна" плануецца арганізаваць платныя аўтобусы, якія будуць курсіраваць па маршруце ДС Кунцаўшчына - ст.м. "Каменная Горка" - ст. Ждановічы - Школа нумар 1 - ІКК "Лінія Сталіна".-0-
