19 снежня, Мінск /Кар. БЕЛТА/. Усе рэгіёны Беларусі з 20 па 29 лістапада прынялі ўдзел у электронным кірмашы вакансій, арганізаваным на адзінай інфармацыйнай пляцоўцы. Больш за 20 тыс. чалавек шукалі на гэтым рэсурсе работу, паведамілі БЕЛТА ў Міністэрстве працы і сацыяльнай абароны.
"На адзінай інфармацыйнай пляцоўцы http://e-vacancy.by дваццаць адзін рэгіён рэспублікі правёў электронныя кірмашы вакансій. У іх прынялі ўдзел 88 наймальнікаў рэспублікі, якія заявілі каля 3 тыс. вакансій.
За гэтыя дні амаль 500 саіскальнікаў у інтэрактыўным рэжыме выйшлі на кантакт з патэнцыяльнымі наймальнікамі. У цэлым электронны рэсурс наведалі больш за 20,5 тыс. чалавек. Самымі актыўнымі наведвальнікамі былі грамадзяне ва ўзросце ад 25 да 34 гадоў - 37 працэнтаў", - падвялі вынікі ў Мінпрацы і сацабароны.
Усе вакансіі, заяўленыя і не запоўненыя наймальнікамі ў час кірмашу, даступныя для прагляду ў агульнарэспубліканскім банку вакансій www.gsz.gov.by. Гэта значыць яны па-ранейшаму актуальныя для саіскальнікаў.
Правядзенне службамі занятасці электронных кірмашоў вакансій стане пастаяннай формай работы па аказанні грамадзянам садзейнічання ў працаўладкаванні, адзначылі ў міністэрстве.-0-