У ліпені 2022-га Аляксандр Лукашэнка наведаў гандлёвы цэнтр "Сталіца" пасля яго рэбрэндынгу. У гандлёвай прасторы прадставілі фірменныя магазіны вядучых айчынных вытворцаў. Прэзідэнт даў даручэнне: па такім жа прынцыпе стварыць беларускі гандлёвы цэнтр на месцы аднаго са сталічных даўгабудаў. У гэтым выпуску YouTube-праекта БЕЛТА "Па факце: рашэнні Першага" мы раскажам, як непабудаваны "Магніт Мінска" стаў вітрынай беларускай прамысловасці, колькі чалавек кожны дзень наведвае Першы нацыянальны гандлёвы дом і навошта ў ГЦ прыязджаюць замежныя дэлегацыі.
Як з'явілася ідэя сабраць пад адным дахам тавары беларускіх вытворцаў
Шматфункцыянальны комплекс на паўночным усходзе беларускай сталіцы пачалі ўзводзіць яшчэ ў 2010 годзе. Планавалася, што "Магніт Мінска" стане апарт-атэлем з гандлёвымі плошчамі і адкрыецца да чэмпіянату свету па хакеі 2014 года. Але іранскі інвестар так і не змог рэалізаваць праект. У снежні 2022 года адбыўся аўкцыён. У выніку заказчыкам аб'екта стала Упраўленне капітальнага будаўніцтва Мінгарвыканкама. Што рабіць з недабудаваным аб'ектам, ужо было вядома. Над ідэяй стварэння нацыянальнага гандлёвага дома працаваць пачалі адразу пасля даручэння Прэзідэнта, якое ён даў, наведваючы гандлёвы цэнтр "Сталіца" некалькі месяцаў раней.
"Літаральна з наступнага дня пасля наведвання кіраўніком дзяржавы "Сталіцы" мы ўжо акунуліся ў работу па рэалізацыі. Усёй камандай Мінгарвыканкама мы вельмі цесна распрацоўвалі канцэпцыю, графік правядзення работ і іншыя неабходныя мерапрыемствы для таго, каб гэты аб'ект з недабудаванага стаў функцыянуючым", - расказаў генеральны дырэктар ДА "Сталічны гандаль і паслугі" Іван Супрановіч.
Увесь комплекс займае больш за 140 тыс. кв.м. Пад гандаль адвялі каля 52 тыс. кв. Адкрылі "Першы нацыянальны гандлёвы дом" напярэдадні Новага года - 29 снежня 2023-га. Аляксандр Лукашэнка азнаёміўся з работай фірменных магазінаў. Многія прадпрыемствы, прадстаўленыя ў ГЦ, у цяжкія дзевяностыя выстаялі толькі дзякуючы рашэнням Прэзідэнта. Сёння гэта флагманы прамысловасці. Вытворцы ў сваю чаргу падкрэслівалі: стараюцца працаваць на айчыннай сыравіне.
Што можна купіць у Нацыянальным гандлёвым доме
У гандлёвым цэнтры - больш за 130 магазінаў. Купіць можна літаральна ўсё: посуд, каштоўнасці, мэблю і нават… заказаць драўляны дом.
"Для зручнасці наведвальнікаў у нас ёсць даволі шмат як інтэрактыўных, так і стацыянарных навігацыйных панэлей. Згодна з канцэпцыяй, у нас існуе геаграфічны падзел гандлёвых зон па ўсіх адміністрацыйна тэрытарыяльных адзінках, да якіх належаць розныя суб'екты гаспадарання. Сярэдні і верхні ўзроўні адведзены пад шэсць нашых абласцей. Ніжні ўзровень адведзены пад суб'екты гаспадарання Мінска", - адзначыў Іван Супрановіч.
Кошт арэнды ў нацыянальным гандлёвым доме некалькі ніжэйшы за рыначны. Такі падыход дазволіў прэтэндаваць на гандлёвае месца ўсім. Тым самым вырасла канкурэнцыя сярод вытворцаў. І цяпер тут прадстаўлены лепшыя.
"Мы бачылі тэндэнцыю, калі пры даволі высокай запаўняльнасці аб'ектаў нерухомай маёмасці, суб'екты малога і сярэдняга прадпрымальніцтва або бізнесу мелі пэўныя цяжкасці з уваходам на рынак. Рашэнне Прэзідэнта якраз заключалася ў тым, што трэба даць магчымасць кожнаму суб'екту з любога кутка нашай Радзімы паспрабаваць рэалізаваць свой бізнес у Мінску. Менавіта таму магчымасць была прадастаўлена ўсім, і ўсе жадаючыя змаглі трапіць на гандлёвыя плошчы", - растлумачыў Іван Супрановіч.
Чым "Першы нацыянальны гандлёвы дом" прываблівае пакупнікоў і вытворцаў
Знайсці месца на прылаўках сталічных гіпермаркетаў або на вітрынах буйных ГЦ рэгіянальным вытворцам часам было складана не толькі з-за канкурэнцыі або высокага кошту арэнды. Калі тавар быў запатрабаваны ў абласцях, ён проста мог не даехаць да сталіцы. Усё раскуплялі на месцах.
Сваім меркаваннем аб "Першым нацыянальным гандлёвым доме" падзяліліся наведвальнікі гандлёвага цэнтра. Галіна расказала, што прыходзіць сюды па неабходнасці, таму што тут ажыццяўляецца абслугоўванне жыхароў Першамайскага раёна. Але і міма фірменных магазінаў жанчына не праходзіць - знаёміцца з асартыментам і адразу ж закупляецца ўсім неабходным.
"Гэта вельмі добрая ідэя, мне падабаецца. Я другі раз прыйшла сюды і шмат чаго цікавага ўбачыла. Сёння хачу паглядзець магілёўскія шторы", - расказала пра свае ўражанні ад гандлёвага цэнтра яшчэ адна наведвальніца Тамара.
Такі фармат, што называецца, зайшоў. У сярэднім кожны дзень нацыянальны гандлёвы дом наведваюць каля дваццаці тысяч чалавек. Зручна! Больш не трэба шукаць фірменныя магазіны любімых вытворцаў і марнаваць час на раз'езды па горадзе.
"Попыт на прадукцыю вялікі. Мы на самай справе чакалі, што будзе менш людзей. Але мы бачым, што пакупніцкі трафік ідзе ўвесь час. І перавага для нас заключаецца ў тым, што гэты трафік ідзе кожны дзень. Калі ў іншых гандлёвых аб'ектах дні з самымі вялікімі продажамі - гэта пятніца, субота і нядзеля, то тут вельмі шмат людзей прыходзяць і ў будныя дні. І пакупнікоў з іншых краін тут значна больш, чым у іншых нашых магазінах. Нашым пакупнікам з іншых краін складана прывезці з сабой дыван. Але яны даведваюцца тут пра брэнд, глядзяць на якасць. І пачынаюць шукаць гэтыя дываны ў продажы ў сваіх краінах", - расказаў кіраўнік рознічнай сеткі ААТ "Віцебскія дываны" Віталь Лугін.
"Ідэя першапачаткова была выдатная. Беларусы і госці з іншых краін у адным месцы могуць пазнаёміцца з усімі таварамі, якія вырабляюцца ў Беларусі. Гэта вельмі вялікая справа. І выручка гэта паказвае. Яна ў нас расце кожны дзень, бо паток людзей бясконцы. Людзі хочуць паспрабаваць усё самае свежае. І цэны тут адны з самых танных", - адзначыў намеснік генеральнага дырэктара па камерцыйных пытаннях ТАА "Бабуліна крынка" Сяргей Янчанка.
Чаму Нацыянальны гандлёвы дом - гэта яшчэ і іміджавы праект
Нацыянальны гандлёвы дом - не проста гандлёвы аб'ект. Гэта іміджавы праект. Туды прыязджаюць, каб убачыць ці паспрабаваць усё самае лепшае з таго, што вырабляюць у Беларусі. Для вытворцы важна пакінуць добрае першае ўражанне. Другога шанцу можа і не быць.
"Мы робім асноўны ўпор на тавары без цукру. Цяпер на іх ёсць попыт. Да нас сюды прыходзяць расіяне і бачаць прадукцыю, якую не бачылі раней. Потым яны звяртаюцца на завод, каб набыць яе і рэалізоўваць у сябе ў краіне", - расказаў Сяргей Янчанка.
"Для нас было своеасаблівым гонарам размясціцца ў гэтым гандлёвым цэнтры. Таму што асабіста я лічу, што тут сабраны лепшыя вытворцы беларускіх тавараў. І мы як адзін з найбуйнейшых вытворцаў дываноў у Беларусі і СНД бачылі гэты аб'ект і як іміджавы праект, дзе кожны беларус можа азнаёміцца з нашай прадукцыяй", - падкрэсліў Віталь Лугін.
Вітрына айчыннай прамысловасці для замежных гасцей
З прапановамі беларускага ранку ахвотна знаёмяцца і замежныя дэлегацыі. Першы нацыянальны гандлёвы дом стаў вітрынай айчыннай прамысловасці. Так, нядаўна яго наведала Азербайджанская парламенцкая дэлегацыя на чале са старшынёй Мілі Меджліса Азербайджанскай Рэспублікі Сагібай Гафаравай.
"Першы нацыянальны гандлёвы цэнтр - гэта гонар для нашай краіны. Вельмі прыемна, што ў маршруце паважанага спікера было наведванне "Першага нацыянальнага". Аб чым мы гаварылі? Аб тым, што трэба павялічваць нашы магчымасці і што патэнцыял нашай прысутнасці на рынку Азербайджана вялікі. Мы ў гэтым годзе падпісалі пабрацімства з Баку. Таму нашы тавары павінны быць максімальна даступныя для спажыўцоў у Азербайджане", - лічыць першы намеснік старшыні Мінгарвыканкама Надзея Лазарэвіч.
"На гэтай пляцоўцы мы хацелі паказаць і прадэманстраваць патэнцыял нашай краіны. Абмяркоўваліся, хоць і на нагах, вектары магчымага супрацоўніцтва. Ёсць пэўныя дамоўленасці. Мы прадэманстравалі такія праекты, як "Першы", наш праект "Дадому", футры Белкаапсаюза, праекты па дывановым холдынгу і абутковую прамысловасць", - расказала старшыня канцэрна "Беллегпрам" Таццяна Лугіна.
Што, акрамя магчымасці закупіцца, прапануе наведвальнікам Нацыянальны гандлёвы дом
"Першы гандлёвы" - пляцоўка "жывая". Тут праводзяць канцэрты, майстар-класы, рэалізоўваюць сацыяльна-значныя праекты. Увогуле і дзецям, і дарослым ёсць на што паглядзець і чым заняцца.
"У нас праводзіліся і будуць праводзіцца своеасаблівыя івент-мерапрыемствы. Ёсць пэўны план работы па развіцці гэтай пляцоўкі. Гэта не штодзённыя падзеі, але мінімум раз у тыдзень нешта будзе адбывацца ў гандлёвым цэнтры, каб прыцягваць увагу", - расказаў Іван Супрановіч.
Аляксандр Лукашэнка, сярод іншага, звярнуў увагу на нестандартнае рашэнне ў дэкоры столі. Тады Прэзідэнту растлумачылі: справа не ў дызайнерскім рашэнні, а ў неабходнасці. Доўгія гады будынак пуставаў. Пачынаць нешта фарбаваць пакуль не варта.
"Вядома, непрывычна столі… але я не ведаю, ці будзеце вы гэта даробліваць - не даробліваць. Я не выключаю, што грошы траціць шалёныя на тое, каб брыльянтамі тут аздобіць, - гэта, можа, і не трэба. Але ўсе гэтыя вентыляцыйныя адтуліны і дзіркі я ўсё ж такі аформіў бы як трэба. Таму што яны дэманструюць тое, што вы нібыта на хаду будавалі і нешта не дабудавалі", - заўважыў кіраўнік дзяржавы падчас наведвання "Першага нацыянальнага гандлёвага дома" ў снежні мінулага года.
Рашэнне прынята: столь упрыгожаць лаканічна, каб кошт дэкору не паўплываў на цану арэнды. Як менавіта - можна будзе ўбачыць у бліжэйшыя чатыры месяцы.
У якіх гарадах Расіі з'явяцца гандлёвыя дамы з беларускімі таварамі
Для расіян прадукцыя з паметкай "Зроблена ў Беларусі" - знак якасці. Тавараабарот паміж краінамі павялічваецца. Наведваючы Першы нацыянальны гандлёвы дом, Аляксандр Лукашэнка адзначыў, што беларускія тавары ў Расію трэба прадаваць без пасрэднікаў.
"У Піцеры чаму б не пабудаваць такі будынак і завезці тавар? У Маскве чаму, у Смаленску? У Бранску, у Пскове? Побач зусім. І мы маглі б размяшчаць там свае тавары і прадаваць. Прытым расіяне ж не супраць. Зямлю прапануюць. Асабліва у Пецярбургу - людзі ідуць насустрач. Вывозь свой тавар і прадавай. І людзі на беларускае добра рэагуюць. Хацелася б, каб мы над гэтым падумалі. А не тое, што мы за паўцаны аддаём нейкім жулікам. І яны наш тавар прадаюць у Расіі. А потым мы іх саджаем пачкамі ў Беларусі ў турму за хабары", - канстатаваў Аляксандр Лукашэнка, наведваючы "Першы нацыянальны гандлёвы дом" у снежні 2023 года.
Ужо ў сакавіку бягучага года стала вядома: Беларусь адкрые ў расійскіх гарадах гандлёвыя дамы з айчыннымі таварамі і мультыбрэндавыя цэнтры тэхнікі. Пілотныя праекты рэалізуюць у Казані, Ніжнім Ноўгарадзе і ва Уфе.
БЕЛТА.-0-
Падпісвайцеся на нас у
