9 верасня, Мінск /Кар. БЕЛТА/. Прэзідэнт Беларусі Аляксандр Лукашэнка 9 верасня падпісаў указ нумар 353, у адпаведнасці з якім уносяцца змяненні ў шэраг заканадаўчых актаў. Аб гэтым карэспандэнту БЕЛТА паведамілі ў прэс-службе беларускага лідара.
У прыватнасці, уносяцца змяненні і дапаўненні ў Палажэнне аб праходжанні службы ў органах унутраных спраў Рэспублікі Беларусь у мэтах прывядзення яго ў адпаведнасць з пазней прынятымі заканадаўчымі актамі (Кодэксам Рэспублікі Беларусь аб адукацыі, законамі Рэспублікі Беларусь "Аб барацьбе з карупцыяй", "Аб дзяржаўнай службе", "Аб натарыяце і натарыяльнай дзейнасці", "Аб рэгістры насельніцтва" і іншымі), а таксама для ўліку практычнага вопыту яго прымянення.
Змяненні накіраваны на павышэнне эфектыўнасці кадравага забеспячэння органаў унутраных спраў, удасканаленне прававой і сацыяльнай абароны супрацоўнікаў.
У прыватнасці, уводзіцца новая падстава для адмовы грамадзяніну ў прыёме на службу ў органы ўнутраных спраў і спынення гэтай службы - набыццё грамадзянства (падданства) замежнай дзяржавы. Павялічваецца мяжа ўзросту прыёму на службу з 25 да 28 гадоў у сувязі са змяненнем мяжы ўзросту стану на службе з 45 да 48 гадоў.
Прадугледжаны дадатковыя гарантыі членам сям'і супрацоўніка органаў унутраных спраў у частцы бясплатнага медыцынскага абслугоўвання ў арганізацыях МУС. Замацоўваецца магчымасць забеспячэння супрацоўнікаў бясплатным харчаваннем па нормах, устаноўленых заканадаўствам, у выпадках прыцягнення іх да аховы грамадскага парадку пры пераводзе іх на ўзмоцнены варыянт нясення службы.
Супрацоўнікам органаў фінансавых расследаванняў, Следчага камітэта, органаў і падраздзяленняў па надзвычайных сітуацыях і Дзяржаўнага камітэта судовых экспертыз прадастаўляецца права медыцынскага абслугоўвання ў арганізацыях МУС, санаторна-курортнага лячэння і аздараўлення на ўмовах і ў парадку, які ўстаноўлены для супрацоўнікаў складу органаў унутраных спраў.
Ва ўказе змешчана важная норма аб тым, што на базе органаў унутраных спраў могуць стварацца ваенна-патрыятычныя клубы, што будзе садзейнічаць развіццю патрыятычнага выхавання моладзі.-0-
Падпісвайцеся на нас у
