Лукашэнка: з мэтавымі накіраваннямі трэба разабрацца

27 жніўня, Мінск /Кар. БЕЛТА/. У Беларусі неабходна ўдасканаліць сістэму падрыхтоўкі мэтавікоў. Аб гэтым кіраўнік дзяржавы Аляксандр Лукашэнка заявіў 27 жніўня на Рэспубліканскім педагагічным савеце, перадае карэспандэнт БЕЛТА.

У працяг размовы аб сістэме адукацыі Прэзідэнт падкрэсліў: "З мэтавымі накіраваннямі трэба таксама разабрацца. Здаецца, сістэма ёсць, але належнай празрыстасці і эфектыўнасці няма".

Кіраўнік дзяржавы звярнуў увагу, што мінула ўжо шмат часу з той пары, як было прынята глабальнае рашэнне наконт мэтавікоў, і надышоў час падвесці вынікі. "Андрэй Іванавіч, трэба гэта зрабіць ва ўрадзе і далажыць", - звярнуўся Аляксандр Лукашэнка да міністра адукацыі Андрэя Іванца.

Аляксандр Лукашэнка адзначыў, што ўзровень падрыхтоўкі патрэбных кадраў часта вымушае жадаць лепшага - дзесьці не так і не таму навучылі. У сувязі з гэтым кіраўнік дзяржавы прапанаваў увесці практыку папярэдняга размеркавання да заканчэння ВНУ (магчыма, на трэцім курсе), каб будучага маладога спецыяліста арыентавалі на асаблівасці работы канкрэтнага прадпрыемства. "Гэта пытанне трэба сур'ёзна прапрацаваць", - сказаў Прэзідэнт.

Крытычныя заўвагі кіраўніка дзяржавы датычыліся таксама саміх заказчыкаў кадраў: "Менавіта вы павінны вызначыць кампетэнцыі, якія патрэбны спецыялісту, і актыўна ўдзельнічаць у распрацоўцы вучэбных праграм і кваліфікацыйных патрабаванняў". А тут павінны ўжо актыўна падключыцца самі выкладчыкі ВНУ. "Ніякі інжынер з вытворчасці або намеснік дырэктара, майстар да вас не прыйдзе і не скажа: "Давайце перапрацуем праграму". Вы (педагогі. - Заўвага БЕЛТА) павінны туды прыйсці і прапанаваць", - удакладніў Аляксандр Лукашэнка.

Навучанне неабходна будаваць з улікам інтарэсаў і адукацыі, і рэальнага сектара, падкрэсліў Прэзідэнт. "І наогул, калі вы даяце абітурыенту мэтавае накіраванне, то павінны яго курыраваць увесь перыяд навучання. Гэта ваша зона адказнасці. Як і далейшае замацаванне маладога спецыяліста", - звярнуў увагу кіраўнік дзяржавы.-0-