Лукашэнка выступіў за больш актыўны ўдзел "сям'і ШАС" у вырашэнні глабальных пытанняў харчовай бяспекі

3 ліпеня, Мінск /Кар. БЕЛТА/. У Беларусі бачаць неабходнасць больш актыўнага ўдзелу "сям'і ШАС" у вырашэнні глабальных пытанняў харчовай бяспекі, шмат у чым выкліканых аднабаковымі прымусовымі мерамі (санкцыямі). Аб гэтым Прэзідэнт Беларусі Аляксандр Лукашэнка заявіў у інтэрв'ю міжнароднаму інфармацыйнаму агенцтву Казінфарм напярэдадні саміту ШАС у Астане, паведамляе БЕЛТА. "Адно з ужо відавочных сёння наступстваў незаконных санкцый - сур'ёзнае абвастрэнне праблемы голаду ў свеце", - падкрэсліў беларускі лідар.

Ён прывёў прыклад таго, як абмежаванні на транзіт беларускіх калійных угнаенняў - а яны складаюць каля 20 працэнтаў іх сусветнай вытворчасці - справакавалі сур'ёзны рост цэн на іх. "Як вынік, многія краіны былі вымушаны адмовіцца ад іх выкарыстання, драматычна пагоршыўшы якасць і скараціўшы аб'ёмы ўраджаю", - канстатаваў кіраўнік дзяржавы.

Паводле даных ААН, у 2023 годзе кожны пяты жыхар планеты ў 59 краінах сутыкнуўся з вострай няхваткай прадуктаў харчавання, больш за 280 млн чалавек па ўсім свеце галадаюць, больш за 36 млн дзяцей ва ўзросце да 5 гадоў у 32 краінах востра недаядаюць. Агульны паказчык галадаючага насельніцтва за 7 гадоў вырас з 10 працэнтаў да 20 працэнтаў.

"Таму Беларусь разам з краінамі ШАС гатова паслядоўна рэалізоўваць антысанкцыйныя падыходы, закладзеныя ў Самаркандскай дэкларацыі і рашэннях маючага адбыцца саміту ШАС", - рэзюмаваў беларускі лідар.-0-