3 ліпеня, Мінск /Кар. БЕЛТА/. У Беларусі робіцца ўсё і нават больш, каб армія і народ былі гатовы абараніць краіну. Аб гэтым Прэзідэнт Беларусі Аляксандр Лукашэнка заявіў 3 ліпеня на ваенным парадзе, прысвечаным 80-й гадавіне вызвалення Беларусі ад нямецка-фашысцкіх захопнікаў, перадае карэспандэнт БЕЛТА.
"У імя міру мы ўмацоўваем і развіваем Узброеныя Сілы, удасканальваючы ўсю ваенную арганізацыю дзяржавы. Наш народ павінен ведаць і бачыць: робіцца ўсё і нават больш, каб армія, а таксама войскі тэрытарыяльнай абароны і народнага апалчэння былі гатовы абараніць краіну. І вы ведаеце, яны гатовы", - заявіў Прэзідэнт.
Аляксандр Лукашэнка адзначыў, што шмат гаворыцца пра зброю і боепрыпасы, але галоўнае - гэта людзі.
"Учора адчулі абвастрэнне абстаноўкі на нашых паўднёвых граніцах - тысячы званкоў у ваенкаматы і ў часці, падраздзяленні нашым ваенным, генералам: "Вазьміце нас у армію, дайце нам зброю. Мы будзем абараняць сваю Радзіму!" Не трэба, працуйце спакойна. Наперадзе ў нас вялікія працоўныя будні. А мы, людзі ў пагонах, здольныя сёння не проста абараніць - прадухіліць любую правакацыю на дзяржаўных граніцах нашай краіны", - заявіў Галоўнакамандуючы.
Беларусь валодае самымі сучаснымі ўзорамі ўзбраення і тэхнікі. У краіне актыўна развіваецца абаронны сектар эканомікі. Ствараюцца айчынныя ракетныя комплексы, стралковая зброя, артылерыйскія снарады, беспілотныя лятальныя апараты, сродкі сувязі і аўтаматызацыі. "Тое, што патрэбна для сучаснай вайны", - адзначыў кіраўнік дзяржавы.
"Многае сёння пакажам. Але галоўная наша сіла, як я ўжо сказаў, - людзі. Салдаты і афіцэры - героі нашага часу, якія ўжо цяпер дэманструюць адвагу і сілу духу. Наш парад - гэта прызнанне прафесіяналізму і адданасці абавязку ваенных, пагранічнікаў, байцоў і афіцэраў спецыяльных службаў, якія робяць усё, каб правакацыі з боку недружалюбных краін не перараслі ў поўнамаштабны ваенны канфлікт", - падкрэсліў Аляксандр Лукашэнка.
Прэзідэнт расказаў, што ў парадзе прымае ўдзел менш як 5 працэнтаў ад колькасці Узброеных Сіл. Астатнія ваеннаслужачыя знаходзяцца на баявым пасту. "Мы бязмерна ўдзячныя ім, ведаем, як гэта складана і цяжка. Але акрамя нас не выканае ніхто гэту задачу. Мы для гэтага прызначаны. Для гэтага нас карміў і выгадаваў беларускі народ", - заявіў кіраўнік дзяржавы.-0-
