27 верасня, Мінск /Кар. БЕЛТА/. Прэзідэнту Беларусі Аляксандру Лукашэнку ў час наведвання БДУІР прадэманстравалі навуковыя распрацоўкі як гэтай, так і іншых тэхнічных ВНУ, перадае карэспандэнт БЕЛТА.
Яны датычацца такіх сфер, як стандартызацыя, павышэнне абараназдольнасці, авіяцыя, транспарт і бяспека дарожнага руху. Былі таксама прадстаўлены распрацоўкі ў галінах медыцынскіх і аграрных тэхналогій, сувязі.
БДУІР у тым ліку працуе сумесна з абаронным сектарам беларускай эканомікі. Аляксандр Лукашэнка пацікавіўся, ці могуць яны дапамагчы зрабіць высокадакладную і перашкодаўстойлівую ракету. Рэктар Вадзім Богуш далажыў, што работы ў гэтым напрамку вядуцца.
"Калі вы гэта зробіце, тады я буду лічыць, што вы не дарэмна хлеб ясце. Усё, што трэба, прасіце. Мы вам створым усе ўмовы. Але трэба зрабіць ракету перашкодаўстойлівую", - сказаў кіраўнік дзяржавы.
Абмяркоўваючы яшчэ адну распрацоўку вучоных ВНУ, Аляксандр Лукашэнка адзначыў, што трэба не адстаць у сферы распрацовак беспілотнага транспарту.
Абмеркавалі і сацыяльную сферу - забяспечанасць месцамі ў інтэрнатах, добраўпарадкаванне стадыёна.
Рэктар Беларускага дзяржаўнага ўніверсітэта інфарматыкі і радыёэлектронікі, старшыня рэспубліканскага савета рэктараў устаноў вышэйшай адукацыі Вадзім Богуш далажыў кіраўніку дзяржавы аб стане і перспектывах развіцця ВНУ.
"БДУІР рыхтуе спецыялістаў і праводзіць навуковыя даследаванні па трох асноўных ключавых для краіны напрамках: мікраэлектроніка, радыёэлектроніка і сфера інфармацыйных тэхналогій. Мы працуем у цеснай звязцы з нашымі прадпрыемствамі. І ўступную кампанію гэтага года мы выканалі ў поўным аб'ёме, - расказаў рэктар. - Пры гэтым мы пачалі падрыхтоўку па трох новых спецыяльнасцях - "электроннае машынабудаванне" (мы яе робім разам з "Планарам" і "Інтэгралам"), "кіберфізічныя сістэмы" і "лічбавы маркетынг" (разам з прадпрыемствамі Міністэрства прамысловасці і ПВТ)".
Паводле яго слоў, цяпер ва ўніверсітэце навучаецца каля 9 тыс. студэнтаў на дзённай форме атрымання адукацыі. "Мы падтрымліваем развіццё завочнай і скарочанай формы, калі пасля каледжа атрымліваюць вышэйшую адукацыю ў нас. Асаблівую ўвагу ўдзяляем практыцы падрыхтоўкі спецыялістаў. Каля 20 працэнтаў нашых выкладчыкаў - гэта эксперты з рэальнага сектара эканомікі, - адзначыў Вадзім Богуш. - Пры гэтым, ключавое месца ў арганізацыі адукацыйнага працэсу займае ідэалагічная і выхаваўчая работа. І яна будуецца на прынцыпах працоўнага выхавання, спартыўнага выхавання, валанцёрскай дзейнасці, цеснага ўзаемадзеяння з мясцовымі органамі ўлады і рэспубліканскімі органамі дзяржаўнага кіравання".
"Мы актыўна працуем па пазабюджэтнай дзейнасці, - дапоўніў рэктар. - Экспарт адукацыйных паслуг - гэта ключавая для нас задача. Мы актыўна працуем па далёкай дузе, па Афрыцы, акрамя краін СНД. Актыўна працуем з Кітаем. І плануем, што па выніках 9 месяцаў мы выйдзем на паказчык тэмпаў росту экспарту плюс 105 працэнтаў".-0-
Падпісвайцеся на нас у
