23 снежня, Мінск /Кар. БЕЛТА/. Прэзідэнт Беларусі Аляксандр Лукашэнка сабраў нараду па пытаннях развіцця ў Беларусі машынабудавання, перадае карэспандэнт БЕЛТА.
"На гэтай невялікай нарадзе я хацеў бы з вамі пагаварыць пра работу асобных прамысловых прадпрыемстваў і ў цэлым сектара машынабудавання. Ведаю, што ўсе стараюцца. Усе разумеюць, што выбары - гэта экзамен. І не толькі экзамен дзеючага Прэзідэнта, але і ўсёй вертыкалі ўлады. Але ўсё ж такі давайце шчыра: ёсць прадпрыемствы, якія не сёння, дык заўтра могуць атрымаць праблемы. І мы гэта павінны бачыць", - сказаў кіраўнік дзяржавы.
Пра супрацоўніцтва з Расіяй і хуткую сустрэчу з Пуціным
"Пры гэтым, гаворачы пра нашы аўтамабілі і гэтак далей, мы дамовіліся з Расіяй сінхранізаваць нашы адносіны. Я вас папрасіў бы, каб мы дакладна прытрымліваліся нашых дамоўленасцей з Расійскай Федэрацыяй. Трэба разумець, што ў Расіі таксама час няпросты, - канстатаваў беларускі лідар. - Утылізацыйны збор - мы таксама дамовіліся. Як гэта рэалізуецца на сённяшні дзень і ці ёсць якія-небудзь праблемы ў нас з Расійскай Федэрацыяй? Гэта вельмі актуальна ў сувязі з тым, што літаральна праз пару дзён мы сустрэнемся з Уладзімірам Уладзіміравічам Пуціным. І калі трэба будзе абмеркаваць на нашым узроўні якія-небудзь пытанні, мы іх абмяркуем".
Пра ўзаемадзеянне з Масквой і дамоўленасці з Сабяніным
Аляксандр Лукашэнка згадаў, што літаральна перад нарадай на сустрэчы з мэрам Масквы Сяргеем Сабяніным гаворка таксама ішла аб вытворчасці легкавых аўтамабіляў: "Яны малайцы. Малайчына Сабянін. Ён пачаў вытворчасць марак нашых аўтамабіляў савецкіх. Пад брэндам "Масквіч", ГАЗ і гэтак далей. Але гэта зусім іншыя аўтамабілі, гэта зразумела. І яны тут вельмі сур'ёзна рушылі наперад і ў іх вялікі інтарэс да нас. Не толькі па аўтакампанентах, але і па іншых напрамках".
"Таму і з Масквой добрыя ў нас дамоўленасці. Тавараабарот з імі, як я ўжо адзначаў, у гэтым годзе будзе амаль $7 млрд. А, магчыма, і больш", - дадаў кіраўнік дзяржавы.
Пра рынкі для збыту прадукцыі і мэты мінулых і будучых замежных візітаў
Аляксандр Лукашэнка падкрэсліў неабходнасць пашыраць прысутнасць на традыцыйных рынках: "Я пра гэта гавару ўжо каторы раз, што будучы год будзе няпросты. З-за пэўных прычын. І нашы традыцыйныя рынкі, дзе мы працавалі паспяхова, трэба пашыраць", - заявіў Прэзідэнт.
Размова таксама ідзе аб развіцці супрацоўніцтва з краінамі на так званай далёкай дузе. У гэтым плане кіраўнік дзяржавы згадаў свае нядаўнія візіты ў Аман і ААЭ.
"Таму вось гэтыя візіты ў Аман, Эміраты. У Кітай у бліжэйшы час і гэтак далей. Гэта размова ідзе аб дыверсіфікацыі нашых рынкаў. Як мы іх называлі, трэці наш напрамак - далёкая дуга. Пра гэта ішла размова, - адзначыў Аляксандр Лукашэнка. - Не ўсё мы паказваем сёння, таму што гэтыя нягоднікі там бегаюць (за мяжой. - Заўвага БЕЛТА), асабліва нашы. І ўсё выпрошваюць санкцыі ў амерыканцаў, у Захаду. Каб яны супраць нас гэтыя санкцыі ўводзілі ўсё новыя. Таму мы не ўсё, зразумела, паказваем і расказваем".
Кіраўнік дзяржавы асобна закрануў тэму вытворчасці легкавых аўтамабіляў. Планы вялікія, але трэба і бачыць рынкі для збыту гэтай прадукцыі. "Сёння я канкрэтна хацеў бы пагаварыць з вамі пра вытворчасць легкавога аўтатранспарту. Мы пачалі вырабляць. Замахнуліся на вялікую колькасць. Але трэба разумець, колькі мы будзем вырабляць у будучым годзе, і бачыць рынкі для рэалізацыі гэтых аўтамабіляў", - заявіў беларускі лідар.-0-
Падпісвайцеся на нас у
