25 чэрвеня 2024, 11:33

Лукашэнка разлічвае на ўступленне Беларусі ў ШАС на саміце ў Астане і дзякуе Расіі за падтрымку

Фота з архіва

25 чэрвеня, Мінск /Кар. БЕЛТА/. Прэзідэнт Беларусі Аляксандр Лукашэнка разлічвае на ўступленне Беларусі ў ШАС на саміце ў Астане і дзякуе Расіі за падтрымку. Аб гэтым ён заявіў на перагаворах з міністрам замежных спраў Расіі Сяргеем Лаўровым, перадае карэспандэнт БЕЛТА.

"Перш за ўсё хачу адзначыць добрую работу нашых МЗС. Я заўсёды гаварыў, што нашы МЗС могуць быць узорам для іншых ведамстваў у рабоце на саюзным нашым трэку. Я вам перш за ўсё за гэта ўдзячны. Але асабліва ўдзячны за тую работу, якую перш за ўсё вы і кіраўніцтва Расіі правялі па далучэнні нас да Шанхайскай арганізацыі супрацоўніцтва, да паўнацэннага ўдзелу Беларусі ў гэтай арганізацыі, - заявіў беларускі лідар. - Мы вельмі спадзяёмся, што гэта (уступленне Беларусі ў ШАС. - Заўвага БЕЛТА) адбудзецца ў Астане (на саміце ШАС у пачатку ліпеня. - Заўвага БЕЛТА). Прынамсі, мяркуючы па вашых выказваннях апошнім часам, я бачу, што мы выканалі ўсе абавязацельствы і такіх праблем па ўступленні Беларусі ў ШАС сёння няма. Гэта вельмі важна для Беларусі".

Аляксандр Лукашэнка адзначыў важнасць прысутнасці на такой "больш-менш канкрэтнай" міжнароднай пляцоўцы, дзе ўдзельнічаюць вядучыя лідары сусветных дзяржаў.

"Важна не толькі з пункту гледжання іміджу і палітыкі, але і з пункту гледжання эканомікі. Ёсць магчымасць у любы момант абмеркаваць любыя пытанні, у тым ліку і канкрэтныя", - сказаў ён.

Зрэшты, і раней, як адзначыў кіраўнік дзяржавы, ён заўсёды мог пагаварыць з любым з лідараў краін ШАС, атрымаць адказы па нейкіх пытаннях або падтрымку па тых ці іншых праблемах.

"А цяпер мы будзем удзельнічаць у прыняцці ўсіх рашэнняў, якія па статусе належаць Шанхайскай арганізацыі супрацоўніцтва", - падкрэсліў Прэзідэнт.

У сваю чаргу Сяргей Лаўроў запэўніў, што па пытанні набыцця Беларуссю паўнапраўнага членства ў ШАС усё вырашана.

"Усе ўжо дамоўленасці замацаваны. Самым першым актам саміту ў Астане будзе афіцыйнае прыняцце Беларусі ў паўнапраўныя члены ШАС. І ўвесь астатні саміт Беларусь будзе ўдзельнічаць нараўне з усімі астатнімі членамі", - сказаў ён.-0-

Падпісвайцеся на нас у