19 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка сёння на Алімпійскім сходзе НАК расказаў, як у час нядаўняга знаходжання ў ААЭ рабіў ранішнія прабежкі на 15 км, перадае карэспандэнт БЕЛТА.
Паводле слоў Аляксандра Лукашэнкі, знаходзячыся ў Аб'яднаных Арабскіх Эміратах, ён шмат трэніраваўся. "Пачалі бегаць. Я ў сваім узросце - 15 кіламетраў з раніцы. Дыхаць няма чым, гарачыня несусветная. Вось бягу і думаю (пра беларускіх спартсменаў. - Заўвага БЕЛТА), як яны там, у г.Доха (на чэмпіянаце свету па лёгкай атлетыцы, які праходзіў у Катары. - Заўвага БЕЛТА). Цэлы тыдзень: раніцай трэніроўка дзве гадзіны, вечарам трэніроўка - ужо зусім іншы від спорту і лазня. Думаю, вытрымаю ці не вытрымаю. Праўда, напісалі, што я там паміраю. Зразумеў, што сапраўдны спартсмен і ў гэтых умовах павінен бегаць і даваць рэзультат", - сказаў кіраўнік дзяржавы.
У час праведзенага афіцыйнага візіту ў Аўстрыю і выступлення Прэзідэнта на бізнес-форуме таксама гучала тэма бегу. Старшыня Нацыянальнага савета Вольфганг Саботка, які прысутнічаў з аўстрыйскага боку, быў вымушаны выступаць не за трыбунай, паколькі пасля нядаўніх аперацый на каленных суставах яму гэта было фізічна цяжка. Аднак ён выказаў упэўненасць, што ў хуткім часе паправіцца і нават зможа абагнаць кіраўніка беларускай дзяржавы на дыстанцыі 100 м. Аляксандр Лукашэнка ў сваю чаргу назваў смелай гэту заяву. "На 100 метраў магу аддаць пальму першынства, але на 10 кіламетраў вы не рызыкуйце", - заўважыў беларускі лідар.-0-
