6 лістапада, Мінск /Кар. БЕЛТА/. Прэзідэнт Беларусі Аляксандр Лукашэнка напярэдадні агульнарэспубліканскага свята 7 лістапада прыме ўдзел у цырымоніі ўрачыстага адкрыцця ў Мінску басейна міжнароднага стандарту, паведамляе БЕЛТА.
Аляксандр Лукашэнка таксама азнаёміцца з матэрыяльнай базай і арганізацыяй работы басейна.
На адкрыццё аб'екта запрошаны прадстаўнікі спартыўнай грамадскасці, пасольства КНР і генеральнай падраднай арганізацыі "Пекінская будаўніча-інжынерная група".
Басейн - гэта адзін з праектаў у рамках гуманітарнага супрацоўніцтва Беларусі і Кітая. Яго пачалі будаваць у жніўні 2020 года. Праектаванне і будаўніцтва ажыццяўлялася кітайскім бокам пад ключ у адпаведнасці з тэхнічнымі патрабаваннямі і нормамі КНР, выкананнем тэхнічных патрабаванняў і крытэрыяў Міжнароднай федэрацыі плавання. Катэгорыя аб'екта згодна з патрабаваннямі World Aquatics - AC-5 (чэмпіянаты і першынствы свету і Еўропы па водных відах спорту).
Аб'ект плануецца выкарыстоўваць у якасці сучаснай вучэбна-трэніровачнай базы для падрыхтоўкі нацыянальных каманд Рэспублікі Беларусь і правядзення нацыянальных спаборніцтваў па водных відах спорту, аказання паслуг грамадзянам, а таксама правядзення спаборніцтваў высокага міжнароднага ўзроўню. Тут створаны аптымальныя ўмовы для арганізацыі вучэбна-трэніровачнага працэсу, харчавання, адпачынку і аднаўлення спартсменаў, навукова-метадычнага суправаджэння.-0-
Падпісвайцеся на нас у
