![](https://blr.belta.by/images/storage/news/with_archive/2024/000019_1720889595_133491_big.jpg)
(Абноўлена 21.04)
13 ліпеня, Лунінецкі раён /Кар. БЕЛТА/. Прэзідэнт Беларусі Аляксандр Лукашэнка ў Лунінецкім раёне правёў нараду па пытаннях забеспячэння ваеннай бяспекі краіны на паўднёвым аперацыйным напрамку, перадае карэспандэнт БЕЛТА.
Удзельнікі нарады – дзяржсакратар Савета бяспекі Беларусі Аляксандр Вальфовіч, старшыня КДБ Іван Тэртэль, міністр унутраных спраў Іван Кубракоў, міністр абароны Віктар Хрэнін, начальнік Генеральнага штаба Узброеных Сіл Павел Муравейка, старшыня Дзяржпагранкамітэта Канстанцін Моластаў, камандуючы сіламі спецыяльных аперацый Узброеных Сіл Вадзім Дзенісенка, камандуючы ВПС і войскамі ППА Андрэй Лук’яновіч.
Як паведамлялася, 13 ліпеня Аляксандр Лукашэнка ў Лунінецкім раёне Брэсцкай вобласці наведаў месца дыслакацыі 56-га зенітнага ракетнага палка. У першую чаргу кіраўнік дзяржавы прыехаў на камандны пункт палка, дзе яму далажылі пра абстаноўку пры выкананні задач баявога дзяжурства па проціпаветранай абароне. Потым - пераезд у штаб палка. Аляксандр Лукашэнка агледзеў тэрыторыю, азнаёміўся з інфраструктурай. Заехалі таксама ў аўтамабільны парк палка. Тлумачэнні даваў міністр абароны.
![](https://img.belta.by/uploads/2024-07-Images/6730_1-1.jpg)
Як паведамлялася БЕЛТА, сітуацыя на паўднёвых рубяжах - адна з гарачых тэм апошняга часу. На адпаведныя пытанні Аляксандр Лукашэнка падрабязна выказваўся 2 ліпеня на ўрачыстым сходзе да Дня Незалежнасці. "Мы ні ў якім разе не павінны дапусціць ніякай эскалацыі і ніякага абвастрэння. Я хачу, каб украінскае кіраўніцтва гэта пачула. Канцэнтрацыя ўзброеных сіл, якія нават нічога не значаць, вельмі небяспечная ў час баявых дзеянняў. Мы прааналізавалі сітуацыю. Добра разумеем, што ніякага абвастрэння нам не патрэбна. Мы заўсёды аб гэтым гаварылі. Украінцы разумеюць, што мы адкажам", - сказаў кіраўнік дзяржавы.
Аляксандр Лукашэнка папрасіў украінцаў не сваволіць і не жартаваць з агнём. “Гэта вельмі небяспечна", - адзначыў ён.
Прэзідэнт заяўляў, што беларускія пагранічнікі былі пераведзены на ўзмоцненую ахову дзяржаўнай граніцы. Былі таксама разгорнуты сілы спецыяльных аперацый. У высокай баявой гатоўнасці знаходзіліся войскі ваенна-паветраных сіл і проціпаветранай абароны як Беларусі, так і Расіі. На пазіцыі былі выведзены ракетныя сістэмы "Паланэз" і "Іскандэр". "Ніякіх чырвоных ліній. Удар усімі відамі ўзбраенняў па загадзя вызначаных цэлях", - недвухсэнсава папярэдзіў беларускі лідар.
Разам з гэтым Аляксандр Лукашэнка заклікаў народ залішне не турбавацца і зноў, як і неаднаразова раней, папрасіў кожнага спакойна займацца сваёй справай. "Усё, аб чым я гавару, - гэта мой клопат і людзей у пагонах. Мы справімся. Я вам гарантую, што ніякіх сутыкненняў на граніцы з Украінай мы не дапусцім. Іх не будзе", - заявіў кіраўнік дзяржавы на ўрачыстым сходзе ў пачатку ліпеня.-0-