Лукашэнка прапануе знізіць здабычу калійных угнаенняў

"Я прасіў бы цябе прапрацаваць (я не ставіў гэту задачу раней) пытанне, з кім гэта трэба (асабліва з расіянамі), па здабычы. Я такіх цэн наогул не памятаю ў гісторыі: вельмі нізкія цэны на калійныя ўгнаенні, хоць праца шахцёраў няпростая. Можа, нам з расіянамі перагаварыць, параіцца і працэнтаў на 10, магчыма, 11, знізіць здабычу калійных угнаенняў. Не тое што дэфіцыт на рынку з'явіцца, а ўсе зразумеюць, што гэта дарагая прадукцыя і за яе трэба плаціць адпаведныя сродкі", - адзначыў Аляксандр Лукашэнка.

Кіраўнік дзяржавы расказаў, што да гэтага пытання падыходзілі ўжо, праўда, вельмі даўно. "Трэба перагаварыць з вытворцамі калійных угнаенняў аб зніжэнні вытворчасці. Чаго за бясцэнак, амаль па сабекошце, а тое і ніжэй часам прадаваць гэты прадукт? Парайся, потым даложыш, прымем адпаведнае рашэнне. Але я схільны да таго, што нам працэнтаў на 10 (можа, больш) трэба знізіць вытворчасць. Галоўнае, каб не пацярпелі людзі: каб своечасова плацілі заработную плату і гэтак далей. Прапрацуй гэта пытанне", - даручыў Прэзідэнт новаму кіраўніку "Беларуськалія".

У той жа час Аляксандр Лукашэнка заявіў, што на ўнутраным рынку ўгнаенні (калійныя, фосфарныя, азотныя) у хуткім часе могуць пачаць прадаваць фактычна па сабекошце. "Так, мінеральныя ўгнаенні ў нас пад санкцыямі. Дык давайце праз прадукты харчавання прададзім іх на рынку", - прапанаваў кіраўнік дзяржавы.
Іншымі словамі, улады хочуць нарасціць вытворчасць прадуктаў харчавання, а, як вядома, беларускія прадукты харчавання карыстаюцца вялікім попытам за мяжой. "І на суседнім рынку, і Кітай сёння гатовы ўжываць, ды і іншыя. Давайце нарэшце ўнясём дастатковую колькасць мінеральных угнаенняў, каб атрымаць большы ўраджай у раслінаводстве і, адпаведна, у жывёлагадоўлі атрымаць больш малака і мяса і прадаць іх", - адзначыў Прэзідэнт.

Ураду даручана прапрацаваць гэтыя пытанні.-0-