Лукашэнка пракаменціраваў выхад з прэзідэнцкай гонкі Чамаданавай і Бобрыкава

"Я быў прыхільнікам, каб усе партыі, буйныя грамадскія арганізацыі вылучалі сваіх кандыдатаў. Вылучылі: Оля Чамаданава ў нас была і Бобрыкаў. Ну, нармальныя людзі. Вядома, яны прыхільнікі Прэзідэнта. І яны ішлі: "Мы ведаем, што Прэзідэнт выйграе, але мы не дадзім яго пакрыўдзіць". Як быццам мяне нехта мог пакрыўдзіць. А потым паглядзелі, паглядзелі: унутры арганізацый не вельмі гэта разумеюць (іх вылучэнне. - Заўвага БЕЛТА). І яны: "Лепш мы здымемся". Ну, як мяне праінфармавалі. Я толькі ўчора даведаўся, што яны зняліся з гэтай дыстанцыі. Будзем разам змагацца за той курс, які мы даўно вызначылі", - падкрэсліў Аляксандр Лукашэнка.

"Няма ніякага страху, што будуць удзельнічаць усе, хто захоча. Мы больш не дадзім магчымасці краіну ні нахіліць, ні на калені, не дай бог, паставіць, ні разбурыць. Гэта выключана, як бы камусьці гэтага ні хацелася", - дадаў Прэзідэнт.

Збор подпісаў у падтрымку вылучэння кандыдатаў у Прэзідэнты стартаваў 7 лістапада і завершыцца 6 снежня 2024 года. Ажыццяўляць збор подпісаў могуць толькі члены ініцыятыўнай групы на пікетах (у месцах, не забароненых мясцовымі выканаўчымі і распарадчымі органамі), а таксама па месцы жыхарства, працы (службы) выбаршчыкаў.

Цэнтрвыбаркамам былі зарэгістраваны сем ініцыятыўных груп у падтрымку вылучэння кандыдатаў у Прэзідэнты. Аднак 12 лістапада стала вядома, што двое прэтэндэнтаў вырашылі спыніць далейшы ўдзел у электаральнай кампаніі. Аб гэтым заявілі старшыня Мінскай гарадской арганізацыі ГА "Беларускі саюз жанчын", начальнік галоўнага ўпраўлення ідэалагічнай работы і па справах моладзі Мінгарвыканкама Вольга Чамаданава і старшыня Рэспубліканскага савета грамадскага аб'яднання "Беларускі саюз афіцэраў" Сяргей Бобрыкаў.

Такім чынам, цяпер прадаўжаецца збор подпісаў у падтрымку вылучэння пяцярых кандыдатаў у Прэзідэнты.

Выбары Прэзідэнта Беларусі назначаны на 26 студзеня 2025 года.-0-