Лукашэнка паабяцаў узмацніць падтрымку будаўніцтва жылля ў вёсцы

4 кастрычніка, Пінскі раён /Кар. БЕЛТА/. Прэзідэнт Беларусі Аляксандр Лукашэнка паабяцаў узмацніць падтрымку будаўніцтва жылля ў вёсцы. Аб гэтым ён заявіў 4 кастрычніка ў час наведвання ААТ "Парахонскае" ў Пінскім раёне, перадае карэспандэнт БЕЛТА.

"Мы ўзмоцнім яшчэ падтрымку вёсцы. Па жыллі мы ўзмоцнім, - сказаў кіраўнік дзяржавы. - Трэба будаваць жыллё там, дзе патрэбна для вытворчасці, дзе ёсць работа чалавеку".

Паводле слоў Прэзідэнта, неабходна будаваць для работнікаў арэнднае жыллё. Гэта нараўне з дастойнай зарплатай прызначана стварыць умовы для прыцягнення спецыялістаў. І распараджацца гэтым жыллём павінен кіраўнік гаспадаркі. "Ты запрашаеш на работу. Дагавор (заключаеш. - Заўвага БЕЛТА). Пайшоў - вызваляй жыллё. Мы павінны будаваць арэнднае жыллё", - сказаў ён.

Але такі падыход не адмяняе і магчымасці будаўніцтва асабістага жылля, калі людзі гэтага хочуць. "Чалавек калі будзе будаваць - зямлю будзем даваць, участкі. Гэта трэба заахвочваць, калі чалавек будуе сваё. Але калі не хапае людзей і табе патрэбны людзі, то ты прыцягнуць можаш і за кошт жылля, і зарплаты. Гэта перш за ўсё", - падкрэсліў беларускі лідар.

Гэтак варта дзейнічаць не толькі ў адносінах да работнікаў АПК, але і іншых галін, не сцягваючы ўсе працоўныя рэсурсы ў гарады на шкоду сельскім тэрыторыям. "Нам трэба ўлічыць жалезабетонна. А так мы ў Мінск збіраем людзей, а потым думаем, а як жа іх заняць, а як школы пабудаваць, а як дзіцячыя сады і пайшло-паехала. Там, дзе нам трэба (варта будаваць. - Заўвага БЕЛТА). І па адукацыі, і па жыллі. Усё трэба прыводзіць у адпаведнасць", - адзначыў Прэзідэнт.-0-