17 кастрычніка, Мінск /Кар. БЕЛТА/. Навуковыя дасягненні ў такіх глабальных напрамках, як асваенне палярных рэгіёнаў, - важны інструмент міжнароднай дыпламатыі, адзначыў Прэзідэнт Беларусі Аляксандр Лукашэнка на сустрэчы з вучонымі і ўдзельнікамі беларускіх антарктычных экспедыцый, перадае карэспандэнт БЕЛТА.
"Вельмі важна, што мы прадаўжаем актыўна ўзаемадзейнічаць з іншымі краінамі ў справе асваення Антарктыды, - адзначыў Прэзідэнт. - Асабліва цяпер, калі складаная геапалітычная абстаноўка патрабуе пошуку новых напрамкаў супрацоўніцтва, прыняцця эфектыўных рашэнняў для пашырэння стваральных ініцыятыў".
У прыклад кіраўнік дзяржавы прывёў супрацоўніцтва з Расіяй у справе асваення Антарктыкі. Гэты напрамак двухбаковага ўзаемадзеяння не раз рабіўся прадметам абмеркавання на вышэйшым узроўні. "Падтрымка будзе аказвацца. Ды яна і цяпер аказваецца, прэтэнзій да Расіі няма. Усялякая будзе падтрымка. Зразумела, трэба працаваць разам, трэба дзяліцца вынікамі даследаванняў і гэтак далей", - сказаў Аляксандр Лукашэнка.
Паводле слоў Прэзідэнта, Антарктыка - проста ідэальны прыклад непрадузятых і канструктыўных адносін паміж рознымі краінамі. "Дзякуй богу, што кавалачак зямлі на планеце яшчэ ёсць, дзе можна ўстанаўліваць і развіваць такія адносіны", - дадаў ён.
"Па вялікім рахунку, навуковыя дасягненні ў такіх глабальных напрамках, як заваяванне космасу, развіццё атамнай энергетыкі, процідзеянне пандэміям, асваенне палярных рэгіёнаў, з'яўляюцца важным інструментам міжнароднай дыпламатыі", - падкрэсліў кіраўнік дзяржавы.-0-
Падпісвайцеся на нас у
