10 ліпеня, Мінск /Кар. БЕЛТА/. Беларусі вельмі цікава развіццё супрацоўніцтва з Нігерыяй. Аб гэтым Прэзідэнт Беларусі Аляксандр Лукашэнка заявіў на сустрэчы з першай лэдзі Нігерыі Алурэмі Цінубу, перадае карэспандэнт БЕЛТА.
"Вельмі добра, што вы прыехалі. Гэта будзе цікавы і вельмі карысны пачатак у нашым супрацоўніцтве. Я вельмі хацеў бы спадзявацца, што пасля вашага візіту адбудзецца візіт і Прэзідэнта, і вашых міністраў у Беларусь для таго, каб мы больш цесна пачалі супрацоўнічаць. Нам вельмі цікава ваша краіна і думаю, што мы будзем вам карысныя. Перадайце, калі ласка, спадару Болу Цінубу мае самыя добрыя пажаданні і скажыце яму, што мы гатовы яго прыняць у любы час", - заявіў беларускі лідар.
"Мы вельмі добра ведаем вашы патрэбнасці, вашы магчымасці. Для нас гэта вельмі важна. І мы можам значна дапамагчы вам, як і вы нам акажаце значную дапамогу ў развіцці. Мы гатовы вам аказаць дапамогу і падтрымку як у развіцці прамысловасці, так і сельскай гаспадаркі, перапрацоўчай прамысловасці. Асабліва ў вытворчасці прадуктаў харчавання. А таксама гатовы ствараць у вас сумесныя прадпрыемствы па вытворчасці розных відаў тэхнікі", - сказаў Аляксандр Лукашэнка.
Ён таксама запэўніў, што беларускі бок гатовы падключыцца і да падрыхтоўкі спецыялістаў для розных галін Нігерыі, а таксама да больш глыбокага супрацоўніцтва ў сферы адукацыі.
"Я прасіў бы вас перадаць Прэзідэнту Нігерыі просьбу аб арганізацыі візіту нашага міністра замежных спраў у вашу краіну. Каб выпрацаваць план нашага супрацоўніцтва. Там жа вы зможаце, у сябе ў сталіцы, на радзіме, вызначыцца і па далейшых кантактах нашых спецыялістаў і членаў урада з вашымі спецыялістамі і членамі ўрада. Той план, які будзе выпрацаваны ў вас на радзіме нашым міністрам і вашымі спецыялістамі, будзе няўхільна выконвацца ў тым ліку і мной", - сказаў Прэзідэнт.
Кіраўнік дзяржавы адзначыў і важнасць развіцця супрацоўніцтва ў гуманітарнай галіне, у тым ліку ў сферы культуры: "Добра, што вы прыехалі да нас, пабудзеце на "Славянскім базары", убачыце нашу, славянскую, у тым ліку расійскую, культуру. Магчыма, у наступным годзе вы крыху культуры сваёй прывезяце да нас".
У сваю чаргу Алурэмі Цінубу падзякавала за запрашэнне, гасціннасць і перадала цёплыя пажаданні ад свайго мужа і Прэзідэнта Нігерыі Бола Цінубу. "Гэта мой першы візіт у Беларусь. І я хачу падзякаваць вам за асаблівую гасціннасць, якая мне была аказана. Разлічвала я, праўда, на невялікія канікулы. Але мой візіт аказаўся вельмі насычаным сустрэчамі. Гэтыя сустрэчы былі вельмі цікавыя", - сказала першая лэдзі.
Яна асабліва згадала аб плённых сустрэчах у Беларускім саюзе жанчын, Міністэрстве адукацыі, са спікерам Савета Рэспублікі Нацыянальнага сходу Наталляй Качанавай.
Падводзячы вынікі сустрэчы з Аляксандрам Лукашэнкам у інтэрв'ю журналістам, Алурэмі Цінубу ахарактарызавала беларускага лідара як чалавека з вялікім сэрцам, які гатовы дапамагаць краіне, сябрам, што вельмі важна ў цяперашні час.
Што датычыцца шчыльнага графіка сустрэч, першая лэдзі адзначыла дзелавы настрой, які зыходзіць ад беларускага боку: "Беларусы вельмі сур'ёзныя людзі. Яны адразу гатовы працаваць. Адразу з самалёта пачаліся рабочыя сустрэчы. Такі сур'ёзны падыход беларусаў вельмі важны для нас. Мы стараемся пабудаваць новую краіну, таму такі настрой вельмі важны".
Алурэмі Цінубу расказала, што Прэзідэнт Нігерыі разумее важнасць дружалюбных адносін і яму хацелася атрымаць інфармацыю з першых вуснаў. "Мы не так шмат ведаем пра Беларусь, таму важна даведацца ўсё на месцы. Даведаліся мы вельмі многае. Гэта надзейны партнёр для нас і ў сферы адукацыі, і сферы сельскай гаспадаркі, якія асабліва для нас важны. Вярнуўшыся дадому, я змагу расказаць гэта яму", - сказала першая лэдзі.-0-
Падпісвайцеся на нас у
