28 чэрвеня, Мінск /Кар. БЕЛТА/. Форум рэгіёнаў - адзін з самых паспяховых і рэзультатыўных праектаў Саюзнай дзяржавы. Аб гэтым Прэзідэнт Беларусі Аляксандр Лукашэнка заявіў у сваім відэазвароце да ўдзельнікаў XI Форуму рэгіёнаў Беларусі і Расіі, перадае карэспандэнт БЕЛТА.
"Форум стаў унікальнай дыялогавай пляцоўкай, набыў свой адметны, непаўторны стыль і прадаўжае прырастаць смелымі, амбіцыйнымі ініцыятывамі. На яго пляцоўках заключана 588 пагадненняў, падпісаны камерцыйныя кантракты на агульную суму звыш 450 мільярдаў расійскіх рублёў. Дасягнуты сур'ёзныя поспехі ў збліжэнні макраэканамічнай, прамысловай, аграрнай, навукова-тэхнічнай і адукацыйнай палітыкі", - сказаў беларускі лідар.
Паводле слоў Аляксандра Лукашэнкі, цяпер на парадак дня Форуму заканамерна выходзяць пытанні пабудовы інавацыйнай эканомікі Саюзнай дзяржавы, паколькі ў сучасным свеце забеспячэнне тэхналагічнага суверэнітэту і нацыянальнай бяспекі немагчымы без распрацоўкі і ўкаранення інавацыйных рашэнняў.
"У Беларусі і Расіі для гэтага ёсць усе неабходныя ўмовы. У нас захаваліся лепшыя навуковыя школы, забяспечана моцная матэрыяльная база. Рэалізуецца адзіная прамысловая палітыка і фарміруецца адзіная навукова-тэхналагічная прастора. І самае галоўнае - мы валодаем магутным чалавечым патэнцыялам", - сказаў Прэзідэнт.
Ён выказаў упэўненасць у тым, што ідэі цяперашняга Форуму рэгіёнаў Беларусі і Расіі знойдуць сваё ўвасабленне: "Мы выйдзем на новы ўзровень саюзнай інтэграцыі, развіцця перадавых тэхналогій і інавацый, рэалізацыі нашых стратэгічных прыярытэтаў".
Удзельнікам Форуму Аляксандр Лукашэнка пажадаў паспяховай і плённай працы на карысць народаў Беларусі і Расіі.-0-
