Лукашэнка: Беларусь на сэканомленыя ад крэдыту на БелАЭС сродкі можа пабудаваць яшчэ адзін блок

26 верасня, Масква /Кар. БЕЛТА/. Беларусь на сэканомленыя ад крэдыту на БелАЭС сродкі можа пабудаваць яшчэ адзін блок. Аб гэтым Прэзідэнт Беларусі Аляксандр Лукашэнка расказаў журналістам у Крамлі пасля завяршэння перагавораў з Прэзідэнтам Расіі, перадае карэспандэнт БЕЛТА.

"Мы сэканомілі даволі шмат сродкаў. Мы можам цэлы энергаблок за гэтыя сэканомленыя сродкі першага крэдыту пабудаваць", - сказаў кіраўнік дзяржавы.

Аднак дзе менавіта будаваць дадатковыя атамныя магутнасці, яшчэ трэба канчаткова вызначыцца. "Асабіста ў мяне ёсць пэўныя ваганні наконт таго, дзе будаваць. Або трэці блок пры цяперашняй станцыі ў Астраўцы. Або на ўсходзе размясціць яго. Спецыялісты і ўрад прапануюць трэці блок будаваць побач - гэта будзе танней. З іншага боку, калі будуецца такі аб'ект, гэта дае развіццё цэламу рэгіёну. Таму ў мяне ёсць лёгкія ваганні. Мы можам і там, і там будаваць. Думаю, мы вызначымся ў бліжэйшы час", - сказаў кіраўнік дзяржавы.

Аляксандр Лукашэнка расказаў, што прэзідэнты далі неабходныя даручэнні ўрадам дзвюх краін. "Яны ўтрасуць, як учора сказаў мне кіраўнік "Расатама", яны гэтыя пытанні ўрэгулююць - дэталі. Калі не ўзнікне непераадольных абставін, мы будзем будаваць трэці блок або новую атамную станцыю", - заявіў Прэзідэнт.-0-