23 снежня, Мінск /Кар. БЕЛТА/. Прэзідэнт Беларусі Аляксандр Лукашэнка анансаваў сваю хуткую сустрэчу з Прэзідэнтам Расіі Уладзімірам Пуціным і візіт у Кітай. Аб гэтым ён заявіў на нарадзе па пытаннях развіцця ў Беларусі машынабудавання, перадае карэспандэнт БЕЛТА.
"Літаральна праз пару дзён мы сустрэнемся з Уладзімірам Уладзіміравічам Пуціным. І калі трэба будзе абмеркаваць на нашым узроўні якія-небудзь пытанні, мы іх абмяркуем", - сказаў кіраўнік дзяржавы.
"Гаворачы пра нашы аўтамабілі і гэтак далей, мы дамовіліся з Расіяй сінхранізаваць нашы адносіны. Я вас папрасіў бы, каб мы дакладна прытрымліваліся нашых дамоўленасцей з Расійскай Федэрацыяй. Трэба разумець, што ў Расіі таксама час няпросты, - адзначыў Прэзідэнт. - Утылізацыйны збор - мы таксама дамовіліся. Як гэта рэалізуецца на сённяшні дзень і ці ёсць якія-небудзь праблемы ў нас з Расійскай Федэрацыяй?
Аляксандр Лукашэнка адзначыў, што будучы год будзе няпросты з-за пэўных прычын. "І нашы традыцыйныя рынкі, дзе мы працавалі паспяхова, трэба пашыраць. Таму вось гэтыя візіты ў Аман, Эміраты. У Кітай у бліжэйшы час і гэтак далей. Гэта размова ідзе аб дыверсіфікацыі нашых рынкаў. Як мы іх называлі, трэці наш напрамак - далёкая дуга. Пра гэта ішла размова", - заявіў беларускі лідар.
Як паведамлялася, у апошняй дэкадзе снежня ў Санкт-Пецярбургу плануецца правесці саміт ЕАЭС і нефармальную сустрэчу лідараў краін СНД. Відавочна, што менавіта пляцоўкі гэтых мерапрыемстваў Аляксандр Лукашэнка меў на ўвазе, гаворачы пра хуткую сустрэчу з Прэзідэнтам Расіі.-0-
Падпісвайцеся на нас у
