Лукашэнка адвёў тыдзень на завяршэнне сяўбы азімых у Беларусі

 

27 верасня, Мінск /Кар. БЕЛТА/. Прэзідэнт Беларусі Аляксандр Лукашэнка ў час рабочай паездкі ў Шклоўскі раён Магілёўскай вобласці даручыў закончыць пасяўныя работы да 3 кастрычніка на поўдні Беларусі, а ў астатняй частцы краіны - да 1 кастрычніка, перадае карэспандэнт БЕЛТА.

"Трэба да трэцяга ў Гомельскай вобласці і Брэсцкай вобласці - на поўдні - закончыць. Да першага ў астатняй частцы краіны ўсё трэба закончыць. Якасна, як належыць", - даручыў Прэзідэнт.

Кіраўніку дзяржавы падрабязна далажылі аб асенніх палявых работах у раёне, вобласці і па краіне ў цэлым. Прэзідэнт таксама ўдакладніў, як ідзе ўборка бульбы, цукровых буракоў, лёну.

Немалаважнай тэмай стаў ураджай кукурузы ў цэлым па краіне - менавіта на кукурузным полі кіраўніку дзяржавы дакладвалі аб сельгасработах. Паводле слоў міністра сельскай гаспадаркі і харчавання Юрыя Горлава, кукурузай засеяна каля 1 млн 300 тыс. га, большую частку якой убіраюць на сілас.

Аляксандр Лукашэнка пацікавіўся разлікамі на ўраджай і гэтай сельгаскультуры. Як далажыў Юрый Горлаў, ураджай кукурузы на зерне плануецца прыкладна каля 2 млн 200 тыс. т.

"Гэта значыць дзве дзвесце - гэта мінімальнае, што мы можам атрымаць? - удакладніў Прэзідэнт і атрымаў сцвярджальны адказ. - Карацей, табе трэба два дзвесце - два з палавінай атрымаць зерня. Гэта і плюшчыць, і сушыць будзем. Астатняе - у сілас".

Міністр пацвердзіў, што пасля неабходнай дапрацоўкі гэта зерне кукурузы ў дастатковай колькасці будзе выкарыстана на корм для буйной рагатай жывёлы, свіней, а таксама птушкі. "А ўвогуле нам трэба выходзіць на 3 млн т зерня кукурузы", - адзначыў Юрый Горлаў.