21 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка 21 кастрычніка заслухаў даклад па пытаннях развіцця сеткі рэспубліканскіх аўтамабільных дарог і фарміравання транспартнай інфраструктуры, якая забяспечвае гадзінную даступнасць да гарадоў-спадарожнікаў, паведамляе БЕЛТА.
На даклад да кіраўніка дзяржавы прыйшоў не толькі міністр транспарту і камунікацый Аляксей Ляхновіч, але і профільны віцэ-прэм'ер Анатоль Сівак, намеснік кіраўніка Адміністрацыі Прэзідэнта Аляксандр Ягораў і генеральны дырэктар ААТ "Кіруючая кампанія холдынга "Белаўтадар" Юрый Масюк.
Адкрываючы сустрэчу, Аляксандр Лукашэнка падкрэсліў, што стан аўтамабільных дарог - найважнейшае пытанне для беларусаў. Гэту тэму на ўзроўні Прэзідэнта планавалі абмеркаваць ужо даўно. У Беларусі цяпер рэалізуецца маштабная дзяржаўная праграма "Дарогі Беларусі", і 2025 год - завяршальны, таму на наступную пяцігодку распрацоўваецца новая дзяржпраграма.
Аб развіцці транспартных зносін з гарадамі-спадарожнікамі
"І адно з асноўных пытанняў - гэта рассяленне насельніцтва, якое імкнецца жыць і працаваць у горадзе-героі Мінску. Я ўжо не раз гаварыў, што перанасяленне Мінска - гэта не на карысць тых людзей, якія жывуць у Мінску. У тым ліку не на карысць тых, хто хоча прыехаць у Мінск", - адзначыў Аляксандр Лукашэнка.
Негатыўныя наступствы ад перанасялення гарадоў, паводле слоў Прэзідэнта, можна ўбачыць на прыкладзе суседніх дзяржаў, асабліва расійскай сталіцы. Паводле афіцыйных даных, у Маскве пражывае амаль 13,1 млн чалавек. Аднак рэальная колькасць людзей, якія адначасова пражываюць у мегаполісе, складае 15 млн чалавек. А па некаторых даных, і ўсе 20.
"Безупынныя пробкі, неабходнасць будаўніцтва ў велізарных маштабах развязак, дарог і гэтак далей. Што прыемнага для чалавека жыць у гэтым жалезабетонным "адзенні", і вакол аўтамабілі, аўтамабілі, аўтамабілі", - сказаў Прэзідэнт.
У Беларусі пайшлі іншым шляхам, пачаўшы развіваць так званыя гарады-спадарожнікі Мінска. Цяпер да іх адносяцца Дзяржынск, Заслаўе, Лагойск, Смалявічы, Фаніпаль і пасёлак Рудзенск. Адсюль няцяжка хутка дабрацца да сталіцы на асабістым аўтамабілі, але неабходна зрабіць гэты шлях яшчэ больш скорасным, падкрэсліў кіраўнік дзяржавы.
"Нам трэба падумаць пра будаўніцтва больш скорасных, незалежных ад аўтамабільных дарог, участкаў. Я не думаю, што гэта зойме шмат часу або вялікіх грошай (запатрабуе. - Заўвага БЕЛТА)", - адзначыў Аляксандр Лукашэнка.
Ён згадаў вопыт Астаны, дзе вырашылі пабудаваць наземнае метро. Планавалася, што чыгуначныя лініі будуць размяшчацца на жалезабетонных апорах. Аднак з-за гэтага праект атрымаўся дарагім і таму прыпыняўся. "Гэта вельмі дорага. У нас што, ёсць такая неабходнасць? Не. Мы можам пабудаваць наземнае метро. Не будзем рыць, як крот, пад зямлёй гэтыя траншэі, а можам выйсці на паверхню ў канцы контураў Мінска і даехаць да тых жа Смалявіч, Лагойска і гэтак далей. Я не думаю, што гэта на цяперашні час вялізныя грошы", - заявіў Прэзідэнт.
У той жа час для жыхароў гарадоў-спадарожнікаў наяўнасць такой транспартнай сістэмы будзе вялікім плюсам, паколькі да сталіцы яны змогуць дабрацца літаральна за 15 хвілін.
"Мы, вядома, там (у гарадах-спадарожніках. - Заўвага БЕЛТА) будзем і працоўныя месцы ствараць, але некаторыя будуць імкнуцца ў Мінск на работу і па іншых пытаннях. Таму трэба ствараць нармальныя не толькі аўтамабільныя, але і чыгуначныя, і іншыя зносіны. Ведаю, што і струнны транспарт распрацоўваецца, шмат распрацовак у свеце ўжо ёсць. Таму ў гэтым напрамку нам трэба рухацца, і ў наступнай пяцігодцы пытанні гарадоў-спадарожнікаў, асабліва Мінска, мы павінны вырашыць. Гэта павінна быць асобная праграма або падпраграма ў праграме "Дарогі Беларусі", - даручыў кіраўнік дзяржавы.
Аб міжнароднай магістралі Масква - Брэст
Але галоўная мэта дзяржаўнай праграмы - гэта ўсё ж падтрыманне ў добрым стане асноўных аўтатрас рэспублікі. Гэта работа вядзецца ў планавым рэжыме, і ў цэлым засталося дабудаваць літаральна пару дарог міжнароднага значэння.
"Буйныя дарогі мы пабудавалі, з абласнымі цэнтрамі з Мінска мы маем добрую сувязь, - канстатаваў Аляксандр Лукашэнка. - З Прэзідэнтам Расіі Уладзімірам Пуціным мы дамовіліся, што ў бліжэйшы час абмяркуем пытанні будаўніцтва скораснай магістралі праз Беларусь з Масквы на захад. Да Брэста прынамсі. Калі заходнікі захочуць у гэтым удзельнічаць, будзем да Берліна працаваць. Не - да Брэста і ў адваротным напрамку на ўсход. Гэта, можна сказаць, пытанне ўжо вырашанае".
Аб дарогах паміж раённымі цэнтрамі і аграгарадкамі
У той жа час Прэзідэнт падкрэсліў, што аўтамабільныя дарогі не абмяжоўваюцца важнымі міжнароднымі і рэспубліканскімі трасамі. Наступны этап - прывесці ў парадак дарогі ад абласных да раённых цэнтраў. Вядома, у такіх месцах неабавязкова арганізоўваць чатырохпалосны рух, але стан аўтамабільных дарог павінен быць на высокім узроўні, патрабуе Прэзідэнт.
Затым неабходна раённыя цэнтры звязаць з аграгарадкамі. "Найважнейшае пытанне, калі мы хочам, каб людзі ў вёсцы жылі і не былі пакрыўджаны. Яны гэтага заслугоўваюць. Таму ў гэтай вялікай праграме трэба прадугледзець будаўніцтва дарог ад раённых цэнтраў да ўсіх аграгарадкоў", - сказаў кіраўнік дзяржавы.
Больш як палова дарог ужо ёсць, але іх трэба мадэрнізаваць і прывесці ў парадак, даручыў ён.
"300 кіламетраў на жвіры", - удакладніў віцэ-прэм'ер Анатоль Сівак.
"Гэта амаль нічога. Таму мы пабудуем з цвёрдым пакрыццём, а астатнія дарогі адновім, - заявіў Аляксандр Лукашэнка. - Вядома, ёсць буйныя пасёлкі, буйныя вёскі. Яны звычайна знаходзяцца на трасах ад раённага цэнтра да аграгарадкоў. Там, дзе не - прадугледзім таксама пад'язную дарогу з улікам перспектыў".
Колькі каштуе будаўніцтва і рамонт дарог
Прэзідэнт звярнуў увагу, што будаўніцтва і рамонт дарог - гэта немалыя грошы. Паводле інфармацыі Міністэрства транспарту і камунікацый, каб правесці бягучы, гэта значыць ямачны рамонт аднаго кіламетра дарогі, патрабуецца Br350 тыс. А на поўную рэканструкцыю, калі з дзвюх палос робяць паўнацэнныя чатыры, - у сярэднім Br10 млн.
"Мы трацім грошы, якія плацяць перавозчыкі, транспартуючы грузы ў асноўным па міжнародных магістралях, асноўных рэспубліканскіх дарогах. Мы з іх бяром грошы і ўкладваем у дарожную сетку. У тым ліку і з бюджэту. І калі мы не будзем асноўныя трасы падтрымліваць у нармальным стане, да нас ніхто не паедзе. Значыць, не будзе грошай наогул на дарожнае будаўніцтва. Таму людзі павінны разумець, што мы спяшаемся і перш за ўсё будуем, прыводзім у парадак і вядзём рамонт на гэтых асноўных трасах. Кожны год. І будзем гэта рабіць, таму што яны прыносяць нам грошы", - растлумачыў кіраўнік дзяржавы.
Але без увагі не пакінуць і самі населеныя пункты. Да рамонту вулічна-дарожнай сеткі ў іх будуць падыходзіць рознымі метадамі. Аляксандр Лукашэнка нагадаў, што ў верасні 2023 года, наведваючы аграгарадок Вішоў у Бялыніцкім раёне, ён азнаёміўся з пілотным праектам па рамонце дарог. У час рэалізацыі праекта работы выконваліся па некалькіх метадах: дзесьці бетон заліваўся на разбураны асфальт, дзесьці зношанае дарожнае пакрыццё перапрацоўвалася і да яго дабаўляўся цэмент. На некаторых вуліцах клалася шырокафарматная бетонная плітка.
"Гэта значыць, мы ўжо алгарытм дзеянняў намацалі ў будаўніцтве і падтрыманні ў нармальным стане дарог. Засталося дзейнічаць", - рэзюмаваў Прэзідэнт.
Як падштурхнуць беларусаў да будаўніцтва жылля ў вёсках
Не так даўно ў Палацы Незалежнасці абмяркоўвалася і дзяржаўная праграма "Будаўніцтва жылля". Асаблівую ўвагу ўлады плануюць удзяліць арэндным кватэрам.
Але кіраўнік дзяржавы нагадаў яшчэ аб адным сваім даручэнні: "Трэба ўсё ж такі нашых беларусаў падштурхоўваць да таго, каб яны ў сёлах, неперспектыўных вёсках ці хутарах куплялі ўчасткі. Гэта ўсё ж такі амаль паўгектара ўчастак. А ёсць шмат участкаў, дзе ніколі людзі не жылі, але там можна пабудаваць жыллё. І багатых людзей дастаткова, небагатых, але якія жадаюць пабудаваць жыллё ў вёсцы, каб дзеці ў іх па траве маглі хадзіць басанож кожны год. Трэба падштурхоўваць іх да гэтага і ствараць адпаведныя ўмовы".
Гэтыя пытанні, дадаў Аляксандр Лукашэнка, неабходна ўлічыць пры фарміраванні дзяржпраграмы на наступную пяцігодку.
Колькі дарог рамантуюць у Беларусі
Прэзідэнт пацікавіўся, як вырашаюцца пастаўленыя перад урадам задачы ў частцы будаўніцтва і рамонту дарог, а таксама па развіцці транспартнай інфраструктуры паміж сталіцай і гарадамі-спадарожнікамі.
"Людзі чакаюць нашых дзеянняў у гэтым напрамку. Мы ім павінны сумленна сказаць, дзе мы будзем працаваць, што мы будзем рабіць. Яны павінны разумець, што мы за адзін год ці за пяць гадоў усё не схопім (што хацелася б), але вельмі многае зробім. Гэта трэба ў праграме (дзяржаўнай праграме "Дарогі Беларусі" на новую пяцігодку. - Заўвага БЕЛТА) прадугледзець", - сказаў кіраўнік дзяржавы.
Як далажыў міністр транспарту і камунікацый Аляксей Ляхновіч, калі ў 2023 годзе было адрамантавана больш за 3 тыс. км дарог і 107 мастоў, то ў 2024-м - ужо звыш 5 тыс. км дарог і 117 мастоў. "Рэканструявалі, капітальны рамонт, бягучы", - растлумачыў ён.
"Гэта добра. У праграме дарожнага будаўніцтва трэба прадугледзець у тым ліку рамонт і аднаўленне мастоў. Я не думаю, што нам трэба будаваць шмат новых мастоў. Нам трэба рэканструяваць масты. Яны ўжо старыя, іх нямала. Яны невялікія ў асноўным, таму трэба працаваць на апярэджанне. Не чакаць, калі нейкі мост пачне разбурацца або наогул абваліцца", - дадаў Аляксандр Лукашэнка.
"Калі гаварыць пра рэспубліканскія аўтамабільныя дарогі, то з 16 тыс. км больш як 1,7 тыс. км мы адрамантуем у гэтым годзе", - дадаў Аляксей Ляхновіч.
З пачатку пяцігодкі аб'ёмы фінансавання будаўніцтва і рамонту дарог павялічыліся больш як у два разы. Калі ў 2021 годзе на гэтыя работы патрацілі крыху менш за мільярд (Br946 млн), то ў 2023-м - амаль два (Br1,926 млрд). У 2024 годзе, які яшчэ не скончыўся, - ужо Br2,5 млрд.
"Вы не забудзьце, я ставіў перад вамі задачу, што там, дзе толькі магчыма (і немагчыма), мы павінны будаваць дарогі з бетонным пакрыццём, - нагадаў аб сваім даручэнні Аляксандр Лукашэнка. - Бетон ёсць бетон. Я кожны дзень езджу па лагойскай трасе - так, яна ўжо трэшчыны дала, дык яна больш за 50 гадоў эксплуатуецца. Дала трэшчыны, мы іх заладзілі - і нармальна. У гэтай праграме чырвонымі літарамі павінна быць вызначана будаўніцтва бетонных дарог".-0-
Падпісвайцеся на нас у
