3 верасня, Мінск /Кар. БЕЛТА/. Анатоль Сівак, які ўзначальваў Мінгарвыканкам, назначаны віцэ-прэм'ерам. Адпаведнае кадравае рашэнне прыняў сёння кіраўнік дзяржавы, паведамляе карэспандэнт БЕЛТА.
"Думаю, што вопыт Сівака вельмі спатрэбіцца ва ўрадзе. Тым больш кіраўніцтва ўрада ў нас - усе зусім маладыя людзі. Таму твой вопыт там вельмі спатрэбіцца. Гэта галоўная думка мая, калі я разглядаў пытанне аб назначэнні вас віцэ-прэм'ерам", - сказаў Прэзідэнт.
Ён адзначыў, што Уладзімір Кухараў, які займаў пасаду віцэ-прэм'ера ва ўрадзе, а цяпер узначаліць Мінгарвыканкам, выдатна ведае сталіцу, працаваў на адпаведных кіруючых пасадах, яго ведаюць людзі.
"Надышоў час правесці гэту ратацыю. Я ўпэўнены, што і ўрад атрымае вопытнага чалавека, талковага, які ведае гэту сферу. І горад Мінск атрымае актыўнага, дзейнага чалавека ў выглядзе былога віцэ-прэм'ера", - рэзюмаваў Аляксандр Лукашэнка.-0-
