29 снежня, Мінск /Кар. БЕЛТА/. Анатоль Лапо назначаны старшынёй Дзяржаўнага пагранічнага камітэта. Адпаведнае кадравае рашэнне прыняў Прэзідэнт Беларусі Аляксандр Лукашэнка, перадае карэспандэнт БЕЛТА.
Кіраўнік дзяржавы адзначыў, што ў час узмоцненай аховы граніц ведамства не павінна заставацца без гаспадара. Асабліва напярэдадні навагодніх свят, якія лічацца цяжкай парой для пагранічных застаў.
"З усіх кандыдатур, якія мне прапанавалі, я прыняў рашэнне назначыць вас на гэту пасаду. Вы ўсё ведаеце. Для вас тайн у пагранічных войсках няма, - сказаў Аляксандр Лукашэнка. - Усё, што нагарадзілі лішняга (хоць і няшмат, напэўна), трэба выправіць, калі гэта памылкі. Таму вы паглядзіце, зыходзячы са свайго пагранічнага вопыту. Вы былі начальнікам заставы - ведаеце жыццё пагранічніка і адтуль. Напэўна, і па граніцы хадзілі старшым нарада або ў нарадзе".
Асаблівую ўвагу Прэзідэнт звярнуў на аптымізацыю ведамства. "Вы ведаеце, што трэба пакінуць, што скасаваць. Трэба ўсё аптымізаваць. Усё, што вы сэканоміце, застанецца ў вас - ніхто не забярэ. Але самае галоўнае - гэта належнае выкананне абавязку пагранічніка. Ён нікому нічога не даруе, ён не павінен дараваць. Толькі вам дазволена хадзіць па апошнім метры зямлі, больш нікога там няма. І вы павінны па гэтым апошнім метры нашай роднай Беларусі дастойна хадзіць, абараняючы і ахоўваючы яе", - падкрэсліў кіраўнік дзяржавы і дадаў, што дапускаць парушэнняў дзяржаўнай граніцы недазвольна.
"Вы ўзброеныя людзі, вы павінны абараняць яе належным чынам. Вы павінны абараніць на апошнім метры нашай зямлі Айчыну. Вось ваша галоўная задача, - сказаў Аляксандр Лукашэнка. - І адпаведна падбірайце для гэтага пагранічнікаў. Не забывайце: нягледзячы на тое, што вы пагранічнікі, вы частка Узброеных Сіл. Вы павінны быць больш падрыхтаваны, чым армія, як спецназаўцы".
Прэзідэнт таксама адзначыў заслугі Леаніда Мальцава, які працаваў на розных дзяржаўных пасадах. "Мы ж Мальцава не выганяем. Ён аддаў вельмі шмат краіне. Яго трэба заўсёды выкарыстоўваць для справы", - сказаў кіраўнік дзяржавы.
Біяграфія Лапо А.П.
29 снежня, Мінск /Кар. БЕЛТА/. Лапо Анатоль Пятровіч нарадзіўся 24 мая 1963 года ў в. Кулакоўка Бялыніцкага раёна Магілёўскай вобласці.
У 1986 годзе скончыў Галіцынскае Вышэйшае пагранічнае ваенна-палітычнае вучылішча КДБ СССР імя К.Я.Варашылава, у 2001 годзе - Акадэмію федэральнай пагранічнай службы Расійскай Федэрацыі.
З 1981 па 1992 год праходзіў службу ў Чырванасцяжнай Закаўказскай пагранічнай акрузе КДБ СССР на розных пасадах: ад радавога тэрміновай службы, намесніка начальніка пагранічнай заставы, начальніка пагранічнай заставы да намесніка каменданта - начальніка штаба пагранкамендатуры.
У перыяд з 1992 па 2008 год на розных пасадах праходзіў службу ў Смаргонскім пагранічным атрадзе, з 2004 года быў начальнікам гэтага атрада.
У 2008 годзе быў назначаны на пасаду намесніка начальніка галоўнага аператыўнага ўпраўлення Дзяржаўнага пагранічнага камітэта Беларусі, а затым - намесніка старшыні Дзяржпагранкамітэта - начальніка галоўнага ўпраўлення матэрыяльна-тэхнічнага забеспячэння.
З 2014 года працаваў намеснікам старшыні Дзяржаўнага пагранічнага камітэта Беларусі.
Генерал-маёр.
Узнагароджаны шэрагам дзяржаўных узнагарод СССР і Рэспублікі Беларусь, сярод якіх медаль "За баявыя заслугі", медалі "За бездакорную службу" І і ІІ ступені, ордэн "За службу Радзіме" ІІІ ступені.
У снежні 2016 назначаны старшынёй Дзяржаўнага пагранічнага камітэта.
