24 кастрычніка, Мінск /Кар. БЕЛТА/. Прэзідэнт Беларусі Аляксандр Лукашэнка пачаў працоўны тыдзень з абмеркавання сітуацыі ў банкаўскай сферы, перадае карэспандэнт БЕЛТА.
На даклад былі запрошаны старшыня праўлення Нацыянальнага банка Павел Калаур, першы віцэ-прэм'ер Мікалай Снапкоў, намеснік кіраўніка Адміністрацыі Прэзідэнта Максім Ермаловіч, памочнік Прэзідэнта Рэспублікі Беларусь Валерый Бельскі.
Кіраўнік дзяржавы паставіў перад удзельнікамі мерапрыемства шэраг пытанняў і прапанаваў абмеркаваць шырокі спектр тэм. Яны датычацца работы банкаўскай сістэмы ва ўмовах санкцыйнага націску, забеспячэння разлікаў суб'ектаў гаспадарання па знешнегандлёвых аперацыях, супрацоўніцтва з банкамі ў Азіі - рэгіёне, які цяпер актыўна развіваецца і займае ўсё больш значнае месца ў свеце. Вынесеныя на абмеркаванне пытанні таксама датычацца падтрымкі работы рэальнага сектара эканомікі, даступнасці крэдытных рэсурсаў, інфляцыі, удзелу банкаўскай сістэмы ў рэалізацыі інтэграцыйных праектаў з Расійскай Федэрацыяй.
Аб санкцыях
Аляксандр Лукашэнка нагадаў, што ў адносінах да Беларусі былі ўведзены беспрэцэдэнтныя санкцыі. "Год фактычна прапрацавалі ў гэтым рэжыме. Трэба аддаць належнае і эканоміцы, і асабліва банкаўскай сістэме - мы вытрымалі гэтыя санкцыі. Але, як я гаварыў, супакойвацца ні ў якім разе нельга. Першае пытанне: як банкаўская сістэма рэагавала на гэты беспрэцэдэнтны агрэсіўны санкцыйны націск, як была мабілізавана банкаўская сістэма?" - пацікавіўся кіраўнік дзяржавы.
Аб знешнегандлёвых аперацыях і таксічных долары і еўра
Другое і вельмі важнае пытанне, якое абазначыў кіраўнік дзяржавы, датычыцца мер па забеспячэнні разлікаў суб'ектаў гаспадарання па знешнегандлёвых аперацыях. "Відаць, мы яго таксама пераадольваем", - адзначыў ён.
Аляксандр Лукашэнка канстатаваў, што сітуацыя ў гэтым плане ўскладнілася і ў большай ступені залежыць ад партнёраў - замежных банкаў. "Але тым не менш нібыта спраўляемся. Але ёсць асобныя моманты. Я гэта адчуваю, бываючы на канкрэтных прадпрыемствах, калі яны просяць аб дапамозе. Таму хацелася б пачуць і адказы на гэтыя пытанні - як мы тут спраўляемся", - сказаў Прэзідэнт.
Ён заўважыў, што па экспартна-імпартных аперацыях 75 працэнтаў і больш разлікаў у свеце ажыццяўляецца з выкарыстаннем долара і еўра. "Таксічных для нас валют", - адзначыў Аляксандр Лукашэнка.
Аб рэальным сектары эканомікі і даступнасці крэдытаў
Наступнае не менш важнае пытанне - забеспячэнне работы рэальнага сектара эканомікі. "Адвечная праблема: Нацыянальны банк спрабуе праводзіць больш жорсткую палітыку; урад, суб'екты гаспадарання просяць, каб яна была мякчэйшай", - адзначыў беларускі лідар.
"Пытанне даступнасці крэдытаў. Цэнтральнае пытанне, якое мы павінны з вамі абмеркаваць. Гэта датычыцца падтрымкі рэальнага сектара эканомікі", - заявіў Аляксандр Лукашэнка.
Ён таксама адзначыў, што ў свой час у Беларусі быў ініцыяваны шэраг навацый у развіцці банкаўскай сістэмы. "БЕЛКАРТ, АРІП, сістэма перадачы фінансавай інфармацыі, потым сэрвісы імгненных плацяжоў. Як ідуць справы?" - пацікавіўся кіраўнік дзяржавы.
Аб супрацоўніцтве з банкамі ў Азіі і інтэграцыйных праектах з Расіяй
"Зразумела, што будучыня за Азіяй. І парадак дня сусветнага развіцця сёння задае Азія", - заўважыў беларускі лідар.
Ён падкрэсліў, што гэты напрамак трэба трымаць у фокусе і ўвазе. "Як у нас тут развіваецца сітуацыя ў супрацоўніцтве з азіяцкімі банкамі, азіяцкімі эканамічнымі суб'ектамі? Якія прымаюцца (дзеянні. - Заўвага БЕЛТА) Нацыянальным банкам у сувязі з перабудовай усёй сусветнай гаспадаркі на Азію? Пытанне ў часе. Ці не ўпускаем мы тут час?" - абазначыў пытанні кіраўнік дзяржавы.
Яшчэ адно пытанне - інтэграцыйныя праекты з Расійскай Федэрацыяй, ці ўсе выконваецца ў адпаведнасці з існуючымі дамоўленасцямі.
Аб інфляцыі "не толькі па буквары, але і ад жыцця"
"Інфляцыя шмат у чым залежыць ад Нацыянальнага банка. Але не ва ўсім. Калі па буквары эканамічным або фінансавым, гэта пытанне Нацыянальнага банка. Я так не лічу. Інфляцыя - гэта рост цэн, гэта пытанні ўсіх узроўняў улады краіны", - падкрэсліў Аляксандр Лукашэнка.
Пры гэтым ён канстатаваў, што Нацыянальны банк у гэтым пытанні традыцыйна вызначальная структура. "Не будзем ад гэтага адмаўляцца", - адзначыў беларускі лідар.
Прэзідэнт пацікавіўся ацэнкай Нацыянальным банкам сітуацыі з інфляцыяй, ростам цэн. "Крытэрый адзін: не толькі буквар эканамічны, які мы ўсе з вамі ўважліва вывучалі, але і ад жыцця. Усе вопытныя людзі. Таму хацеў бы пачуць вашу ацэнку", - абазначыў яшчэ адну тэму для абмеркавання кіраўнік дзяржавы.-0-
