Умовы падаткаабкладання прыбытку ў Беларусі аптымальныя. Такое меркаванне выказала начальнік упраўлення прамога падаткаабкладання галоўнага ўпраўлення метадалогіі падаткаабкладання арганізацый Міністэрства па падатках і зборах Вольга Тарасевіч у час анлайн-канферэнцыі ў прэс-цэнтры БЕЛТА.
"Паэтапная карэкціроўка падатковай сістэмы ў цэлым і падаткаабкладання прыбытку ў прыватнасці была накіравана на спрашчэнне і зняцце абмежаванняў, у сувязі з чым спосабы вызначэння падатковай базы з'яўляюцца аптымальнымі", - адзначыла яна.
Паводле слоў эксперта, стаўка падатку на прыбытак у Беларусі складае 18 працэнтаў і з'яўляецца адной з самых нізкіх сярод краін - партнёраў па ЕАЭС, пры гэтым адсутнічае нарміраванне расходаў і мінімальныя абмежаванні. Для параўнання: у Расіі яна складае 20 працэнтаў і дзейнічае нарміраванне расходаў, у Казахстане - 20 працэнтаў. "Таму бізнесу няма неабходнасці адшукваць розныя схемы, накіраваныя на мінімізацыю падатку на прыбытак", - лічыць Вольга Тарасевіч.
Паводле даных МПЗ, на працягу апошніх трох гадоў удзельная вага падатку на прыбытак у аб'ёме паступленняў, кантралюемых падатковымі органамі, захоўваецца на адным узроўні і ў 2016 годзе склала 11,3 працэнта (11,9 працэнта - у 2014-м).
"Стабільная дынаміка паступленняў сведчыць аб правільным курсе ўдасканалення падатковага заканадаўства", - падкрэсліла начальнік упраўлення МПЗ.
