17 снежня, Мінск /Кар. БЕЛТА/. У Беларусі распрацоўваюць асобны план дзеянняў па стварэнні ўмоў для развіцця эканомікі, паведаміў сёння прэм'ер-міністр Сяргей Румас на пасяджэнні Прэзідыума Саўміна, перадае карэспандэнт БЕЛТА.
"У кастрычніку бягучага года кіраўнік дзяржавы падпісаў указ аб параметрах прагнозу сацыяльна-эканамічнага развіцця краіны на 2020 год. У дакуменце вызначаны ключавыя паказчыкі эфектыўнасці работы ўрада і колькасныя арыенціры. Ад урада патрабуецца выбудаваць паквартальную матрыцу персаніфікаваных задач на 2020 год, якія мабілізуюць усю вертыкаль улады на дасягненне канкрэтных вынікаў, а таксама - навацыя гэтага года - зацвердзіць план дзеянняў па стварэнні ўмоў для развіцця эканомікі на сярэднетэрміновы перыяд. Міністэрствам эканомікі распрацаваны адпаведны праект пастановы ўрада", - адзначыў Сяргей Румас.
Пры падрыхтоўцы дакумента перад распрацоўшчыкамі была пастаўлена задача аптымізаваць даводзімыя паказчыкі і максімальна іх кансалідаваць. З улікам гэтага кіраўнік урада папрасіў сёння далажыць, як выканана гэта даручэнне і як сфарміравана матрыца персаніфікаваных задач. "Праект пастановы фактычна з'яўляецца тым каркасам, на які будуць нанізаны задачы і паказчыкі для старшынь гар- і райвыканкамаў, кіраўнікоў арганізацый", - сказаў прэм'ер-міністр.
Сяргей Румас звярнуў увагу, што пастановай будзе вызначана вычарпальнае кола паказчыкаў, якія могуць быць даведзены да арганізацый. "Іншыя паказчыкі даводзіцца не павінны", - падкрэсліў ён. У цэлым пастанова не прадугледжвае змянення канцэптуальных падыходаў па наборы ключавых паказчыкаў.
Паводле слоў прэм'ер-міністра, традыцыйная эканоміка практычна вычарпала свае рэзервы росту, а далейшае развіццё магчыма толькі пры стварэнні новых вытворчасцей, у тым ліку з прыцягненнем замежных інвестараў. У матрыцы гэта задача вызначана толькі на рэгіянальным узроўні, таму Сяргей Румас прапанаваў таксама абазначыць такія задачы для галін і кіраўнікоў, якія адказваюць за іх развіццё.
План дзеянняў на 2020 год па стварэнні ўмоў для развіцця эканомікі распрацаваны Міністэрствам эканомікі сумесна з Нацбанкам. Як растлумачыў Сяргей Румас, гэты план уяўляе сабой пералік мерапрыемстваў сістэмнага характару, накіраваных на стварэнне ўмоў для паступальнага развіцця эканомікі на сярэднетэрміновым гарызонце.-0-