7 кастрычніка, Мінск /Кар. БЕЛТА/. Разгрузка чарговага танкера з азербайджанскай нафтай для Беларусі пачалася ў порце Адэсы, паведаміў сёння журналістам прэс-сакратар канцэрна "Белнафтахім" Аляксандр Цішчанка, перадае карэспандэнт БЕЛТА.
"Танкер учора прыбыў у порт "Паўднёвы" і пачаў разгрузку", - сказаў Аляксандр Цішчанка.
Нафта будзе дастаўлена на Мазырскі НПЗ праз нафтаправод Адэса - Броды.
Танкер, на якім было каля 95 тыс. т нафты, адпраўлены з порта "Джэйхан" у Турцыі ў верасні.
Як паведамлялася, беларускія НПЗ у кастрычніку плануюць перапрацаваць 1,7 млн т нафты, у тым ліку 1,65 млн т расійскай, уключаючы 80 тыс. т, дастаўленых па чыгунцы.
Раней старшыня канцэрна "Белнафтахім" Андрэй Рыбакоў паведамляў, што Socar у бягучым годзе можа паставіць у Беларусь да 1 млн т нафты.-0-