1 лютага, Мінск /Кар. БЕЛТА/. Міністэрства транспарту і камунікацый зацвердзіла новую інструкцыю аб парадку размеркавання, выдачы і выкарыстання дазволаў на міжнародныя аўтамабільныя перавозкі грузаў. Адпаведная пастанова ведамства нумар 28 ад 30 лістапада 2018 года апублікавана сёння на Нацыянальным прававым партале і ўступае ў сілу 2 лютага, паведамляе БЕЛТА.
У інструкцыі вызначаны паўнамоцтвы Транспартнай інспекцыі Мінтранса на выдачу дазволаў, парадак выдачы і вяртання дазволаў, што падпадаюць і не падпадаюць пад размеркаванне.
З улікам патрабаванняў па выкананні міжнародных аўтамабільных перавозак па шматбаковых дазволах Еўрапейскай канферэнцыі міністраў транспарту (ЕКМТ), устаноўленых рэзалюцыямі міжнароднага транспартнага форуму, у інструкцыі аднесена да парушэння выкарыстанне дазволу ЕКМТ перавозчыкам, які не адпавядае крытэрыям дзелавой рэпутацыі і фінансавага стану, устаноўленым у пунктах 3351 і 3352 правіл аўтамабільных перавозак.
У інструкцыю ўключана формула размеркавання разавых дазволаў, якая дае магчымасць ураўнаважыць уплыў на колькасць дазволаў, што выдаюцца аўтаперавозчыку, ад вопыту выканання міжнародных аўтаперавозак грузаў і ад наяўнасці парку аўтатранспартных сродкаў для выканання міжнародных аўтамабільных перавозак грузаў, якія адпавядаюць сучасным патрабаванням міжнародных экалагічных і тэхнічных стандартаў.
"Таксама ў формуле захаваны адзін з асноўных крытэрыяў, якія ўплываюць на паступленне валютнай выручкі ў рэспубліку, - гэта даходнасць дзейнасці па выкананні міжнародных аўтамабільных перавозак грузаў, у выглядзе суадносін сярэдняй выручкі на адзін транспартны сродак аўтамабільнага перавозчыка і сярэдняй выручкі на адзін транспартны сродак усіх перавозчыкаў, якія ўдзельнічаюць у размеркаванні дазволаў", - адзначылі ў Мінтрансе.
Іншыя змяненні і дапаўненні ў інструкцыю ўнесены на падставе вопыту правапрымяняльнай практыкі і з мэтай яе ўзгаднення з іншымі нарматыўнымі прававымі актамі.-0-
