13 студзеня, Мінск /Кар. БЕЛТА/. Еўрапейскі банк рэканструкцыі і развіцця (ЕБРР) устанавіў новы рэкорд у сваёй дзейнасці ў Беларусі, паведамілі БЕЛТА ў прэс-службе банка.
"У 2019 годзе ЕБРР устанавіў новы рэкорд у сваёй дзейнасці ў Беларусі: банк уклаў больш як $433 млн (390 млн еўра) у 24 праекты ў прыватным і дзяржаўным сектары, дасягнуўшы небывалага ўзроўню штогадовых інвестыцый за ўсю гісторыю дзейнасці ў краіне. ЕБРР таксама прыцягнуў сіндыкаваныя крэдыты на суму 40 млн еўра і мабілізаваў значны аб'ём грантавага фінансавання", - паведамілі ў прэс-службе.
У ЕБРР адзначылі, што дзейнасць банка была шырокамаштабнай і ўсебаковай, яна ўключала як вельмі значныя, так і параўнальна невялікія крэдыты.
Самым вялікім праектам фінансавання стаў суверэнны крэдыт у памеры 126 млн еўра на мадэрнізацыю 12 мастоў у Беларусі. Больш як 300 тыс. жыхароў такіх гарадоў, як Клецк, Любань, Фаніпаль, Баранавічы, Бяроза, Жлобін і Шклоў, змогуць карыстацца мадэрнізаванымі каналізацыйна-ачышчальнымі збудаваннямі ў выніку прадастаўлення банкам інвестыцый у памеры 26,8 млн еўра. Доступ да чыстай пітной вады атрымаюць жыхары ў 80 населеных пунктах у Віцебскай вобласці дзякуючы крэдыту ЕБРР у памеры 15,5 млн еўра абласному водаканалу.
Еўрапейскі банк рэканструкцыі і развіцця ў 2019 годзе таксама прадоўжыў сваю работу з фінансавымі інстытутамі краіны для пашырэння крэдытавання малога і сярэдняга бізнесу і садзейнічання развіццю міжнароднага гандлю. "Крэдытная лінія для падтрымкі малога і сярэдняга бізнесу ў нацыянальнай валюце, прадстаўленая "Пріорбанку" і "Банку Дабрабыт", дапаможа айчынным малым прадпрыемствам пазбегнуць рызык, звязаных з абменным курсам, і забяспечыць больш доўгія тэрміны пагашэння ў адрозненне ад даступных на рынку", - адзначылі ў ЕБРР.
ЕБРР - шматбаковы банк, які садзейнічае развіццю прыватнага сектара і прадпрымальніцкай ініцыятывы ў 38 эканоміках на трох кантынентах. Акцыянерамі банка з'яўляюцца 69 краін, а таксама ЕС і ЕІБ. З пачатку сваёй дзейнасці ў Беларусі ў 1992 годзе ЕБРР інвесціраваў амаль 2,9 млрд еўра ў 130 праектаў у розных сектарах эканомікі краіны.-0-
