Бразілія зацікаўлена ў нарошчванні паставак калійных угнаенняў з Беларусі

2 лютага, Мінск /Кар. БЕЛТА/. Бразілія зацікаўлена ў нарошчванні паставак калійных угнаенняў з Беларусі. Аб гэтым заявіў журналістам Надзвычайны і Паўнамоцны Пасол Бразіліі ў Беларусі Бернард Клінгл 2 лютага па выніках сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.

"Мы хочам не толькі прадоўжыць пастаўкі беларускіх калійных угнаенняў у нашу краіну, але і нарасціць іх", - сказаў дыпламат. Ён звярнуў увагу, што Бразілія, у якой актыўна развіваецца сельская гаспадарка, мае вялікую патрэбу ў пастаўках угнаенняў. "Мы ведаем, што беларускія ўгнаенні вельмі высокай якасці, і ў Салігорску, на нашу думку, вырабляюць самыя лепшыя для нас па якасці калійныя ўгнаенні", - адзначыў пасол.

Паводле яго слоў, у час сустрэчы з кіраўніком дзяржавы абмяркоўваўся ўвесь спектр двухбаковага ўзаемадзеяння. У частцы ўзаемадзеяння па лініі АПК закраналася пытанне пастаўкі беларускай сельскагаспадарчай тэхнікі. "У Беларусі вырабляецца вельмі якасная тэхніка, якая вельмі падыходзіць бразільскім фермерам. Таму размова можа ісці не толькі аб пастаўках беларускай сельскагаспадарчай тэхнікі, але і стварэнні ў Бразіліі лакальных вытворчасцей", - праінфармаваў Бернард Клінгл.

Што датычыцца гандлёва-эканамічнага супрацоўніцтва дзвюх краін, то за студзень - лістапад 2025 года тавараабарот практычна дасягнуў $766 млн і павялічыўся амаль на 25 працэнтаў у параўнанні з аналагічным перыядам 2024-га. Пры гэтым доля беларускага экспарту вельмі значная - больш як $700 млн, што на 30 працэнтаў больш за паказчыкі за той жа перыяд 2024 года. У Бразілію пастаўляюцца ў асноўным калійныя і азотныя ўгнаенні, рэнтгенаўская апаратура, ільняныя тканіны, кантрольныя або вымяральныя прыборы, профільныя праектары. У Беларусь з Бразіліі імпартуюцца пераважна спецыфічныя тавары, кава, замарожаная ялавічына, ацыклічныя спірты, сокі.-0-