13 снежня, Мінск /Кар. БЕЛТА/. Міністэрства эканомікі падтрымлівае ўзмацненне інвестыцыйнага складніка дзяржпраграм. Аб гэтым заявіла намеснік міністра эканомікі Таццяна Бранцэвіч на чарговым пасяджэнні міжведамаснай камісіі па дзяржаўных праграмах, паведамілі БЕЛТА ў прэс-службе ведамства.
У ходзе мерапрыемства разглядаліся прапановы па карэкціроўцы дзяржпраграм "Кіраванне дзяржаўнымі фінансамі і рэгуляванне фінансавага рынку" і "Аграрны бізнес".
Як адзначыла Таццяна Бранцэвіч, дзяржпраграмы з'яўляюцца магутным бюджэтным рычагом развіцця эканомікі, асабліва ў рэгіёнах. "Дзяржава ўкладвае праз гэты інструмент значныя сродкі. Па сутнасці, гэта наш унутраны рэзерв, які ў бягучых умовах трэба максімальна эфектыўна задзейнічаць для дасягнення задач праграмы-2025. Мінэканомікі гатова падтрымліваць карэкціроўкі, якія ўзмацняюць інвестыцыйны складнік мерапрыемстваў дзяржпраграм", - падкрэсліла яна.
Намеснік міністра звярнула ўвагу, што пры гэтым павінен быць пераканаўча даказаны значны эканамічны эфект ад такога "манеўру фінансаваннем" або рэалізаваны інфраструктурныя праекты ў сацыяльнай сферы, якія садзейнічаюць павышэнню якасці жыцця людзей.-0-
