3 сакавіка, Віцебск /Кар. БЕЛТА/. Фінал II Адкрытага конкурсу нацыянальных культур, творчасці і прыгажосці "Грацыя International" адбудзецца 18 сакавіка ў канцэртнай зале "Віцебск", паведамілі БЕЛТА ў гарадскім Цэнтры культуры.
У гэтым годзе конкурс пашырыў межы - яго ўдзельніцамі стануць дзяўчаты з дзевяці краін. Гэта прадстаўніцы Азербайджана, Беларусі, Індыі, Кітая, Конга, Туркменістана, Узбекістана, Шры-Ланкі і ПАР. Дзяўчаты вучацца ў вышэйшых навучальных установах Беларусі. У іх ліку Віцебскі дзяржаўны тэхналагічны ўніверсітэт, ВДУ імя П.М. Машэрава, Віцебскі медыцынскі ўніверсітэт, БДУІР і Беларускі нацыянальны тэхнічны ўніверсітэт.
Фінал конкурсу нацыянальных культур, творчасці і прыгажосці раздзеліцца на два этапы. Першы этап і першае конкурснае выпрабаванне - нацыянальная страва. У другім удзельніцам трэба будзе паказаць свае здольнасці ў прамоўніцкім майстэрстве, творчым конкурсе і дэфіле. У склад журы ўвойдуць прадстаўнікі культурных устаноў, бізнесу, СМІ, гарадской улады, дызайнеры і іншыя.
У час спаборніцтва дзяўчаты будуць змагацца за перамогу ў намінацыях "Міс Грацыя International", "I Віцэ-міс" і "II Віцэ-міс".-0-
