2 верасня, Мінск /Кар. БЕЛТА/. Выстава "Узнёслае і пакорлівае", прымеркаваная да 85-годдзя эстонскага кампазітара Арва Пярта, адкрылася 2 верасня ў Нацыянальнай бібліятэцы Беларусі, паведамілі БЕЛТА ў аддзеле абслугоўвання спецыялізаванымі фондамі НББ.
Арва Пярт - адзін з самых вядомых і папулярных аўтараў сучаснай акадэмічнай музыкі. "Духоўная змястоўнасць і глыбіня, аскетычная прастата і ўнутраная літургічнасць творчасці кампазітара робяць яго музыку небывалай з'явай сучаснага мастацтва", - адзначылі ў НББ.
На мяжы 1959-1960 гадоў Арва Пярт звярнуўся да серыйнай тэхнікі, затым, праз дзесяцігоддзе, актыўна займаўся вывучэннем старадаўняй музыкі. Знаёмства з грыгарыянскімі спевамі і сярэднявечнай паліфаніяй вызначыла накіраванасць яго творчай эвалюцыі. У сярэдзіне 1970-х кампазітар прыйшоў да новага стылю, заснаванага на вельмі простых гукавых элементах: трохгучнасці і руху па тонах дыятанічнага гукавога раду. Першыя ж створаныя ў гэтым стылі творы для званоў і струнных прынеслі кампазітару сусветную вядомасць. "Стыль tintinnabuli быў развіты ў шматлікіх партытурах, прасякнутых пакорлівым і ўзнёслым рэлігійным духам. Да ліку самых вядомых належаць "Страсці па Іаану", "Берлінская імша", "Канон пакаянны", - расказалі ў НББ.
На выставе прадстаўлена араторыя "Поступ свету", канцэрт для віяланчэлі з аркестрам, калаж на тэму "B-A-C-H", кантата для дзіцячага хору "Наш сад". Акрамя таго, наведвальнікі змогуць азнаёміцца з музычным творам "Багародзіца Дзева" ў выкананні капэлы хлопчыкаў Рэспубліканскага музычнага каледжа пры Беларускай дзяржаўнай акадэміі музыкі пад кіраўніцтвам Уладзіміра Глушакова. Дапаўняюць экспазіцыю артыкулы і кнігі пра творчасць юбіляра.
Выстава будзе працаваць па 15 кастрычніка.-0-
